Kyrpad ka JAC ïa ki nongshong shnong ban ïasnohktilang ha ka jingïakhih pyrshah ïa ka Ropeway Project

Shillong, Risaw 21: “Na ka um kaba mih napoh khyndew jong u Lum Shyllong ka pyndap ïa ka Dam ha Mawphlang kaba la ïoh ban sam um sha baroh kiwei ki shnong jong ka Sor Shillong ne kata kaba ki ong ka Greater Shillong Water Sypply Scheme bad nangta lyngba u Lum Shyllong la ïoh ïa ka bording, kumta kum ki dkhot jong ka Joint Action Committee Against Shyllong Peak Ropeway Project ngi khot bad ngi kyrpad ïa baroh ki nongshong shnong ban ïamih ïasnohkti lang, ban don ka jingkitkhlieh kum shipara ban ïengskhem ban pynneh pynsah ïa kaei kaba U Blei u la kyrkhu ïa ngi lyngba u Lum Shyllong,” ong ka President ka JAC ka kong Deborah Marbaniang haba kren sha ki lad pathai khubor ha ka sngi Balang.
Ka la ong ba ka JAC ka don ka jingsngewkhia bad kumta la mih ban pynpaw ka jingpyrshah ïa ka jingpynjot ïa u Lum Shyllong uba U Blei ula thaw bad kyrkhu ïa ka jaitbynriew Khasi nalor ka tyllong umbam umdih la ïoh ruh ka lyer kaba khuid.
“Kane ka kam kam dei shuh tang ïa ngi ki nong Laban hynrei ka dei jong ka ri Khasi Jaiñtia baroh kawei namar u la bsa umbam umdih ïa baroh ki shnong. U Lum Shyllong u long ka jingkyrkhu ïa ka jaitbynriew baroh kawei u long kum ka ïing kaba ai jingim kumta donkam ban ïada ïa u,” ka la ong.
Ka la ong ba kumba ki paidbah ki la ïasnohkti lang ha ka jingïaid paidbah ba jai jai kaba dang shudep pynlong, kumta ka la kyrpad ban ïasnohkti lang bad ka JAC tat haduh bakut jong kane ka jingïakhih bad ban ïoh kheit ïa u soh jong ka jingjop na ka bynta ka jingbha jong ka pateng ka ban sa wan.