Shillong, Risaw 21 : U Myntri Rangbah ka Jylla, Conrad K. Sangma, u la pyntip ba u Lat u la mynjur ïa ka Separate Electoral Roll Bill na ka bynta ka Garo Hills Autonomous District Council (GHADC), kaba long ka sienjam kaban pynsah kynmaw ha ka histori jong ka Council.
Haba kren halor kane ka phang u Myntri Rangbah u la ong ba katkum kane ka aiñ, ki briew bym dei ki riewlum kin ym lah shuh ban thep vote ne ban ïakhun ïa ka elekshon jong ka GHADC.
Shuh shuh u Myntri Rangbah u la ong ba la thaw ïa ka GHADC hapoh ka Khyrnit kaba Hynriew jong ka Riti Synshar jong ka Ri ban ïada ïa ka jinglong kyrpang bad ki hok jong ki riewlum.
Katkum ka jingong jong u, kane ka jingdawa ka dei kaba la sahteng la slem bha hynrei mynta ka la urlong hadien ba u Lat u la ai ka jingmynjur ïa kane ka Bill.
