Ka dei ka thong jong ka sorkar ba ki kam pynroi ki dei ban poi lut sha baroh kawei ka jylla : CM ha Siju

Shillong, Risaw 21: Ka Sorkar Meghalaya ka pynleit jingmut ban pynbha ïa ki jingtei ha ki nongkyndong bad ban pynthikna ba ka jingïarap pisa lyngba ki skhim sorkar kan poi beit sha ki nongïoh jingmyntoi, ong u Myntri Rangbah ka Jylla, Conrad K. Sangma, haba kren ha ka jingïalang ha Siju, South Garo Hills, ha ka Sngi Balang.
U Myntri Rangbah u la ong ba ka rukom treikam jong kane ka sorkar ka kynthup ïa ka jingpynbiang ïa ki jingtei, ka jingïarap ban kyntiew ïa ka kamai kajih, ka pule puthi bad ka jingpynmih ïa ki lad kamai, khnang ba ki paidbah ha baroh ki bynta jong ka jylla kin ïoh jingmyntoi na ki kam pynroi.
Haba kren halor ki skhim jingïarap, u Myntri Rangbah u la pyntip ba ka song pisa kaba T.20-30 klur hapoh ka skhim FOCUS+ la dep pyllait ha u bnai ba la dep sha ki 1.12 lak ngut ki nongïoh jingmyntoi. “Ka bynta kaba ar bad ki jingsiew kiba dang sah la thmu ban pyllait ha u bnai Nohprah 2026, katba ka jingpdiang kyrteng ïa ki nongïoh jingmyntoi kiba thymmai ka dang ïaid shakhmat,” u la ong.
Ha kajuh ka por, u la ïathuh ba ka sorkar ka la dep pynphai T.204 klur lyngba ki scholarship sha ki 95,000 ngut ki khynnah pule ha kine ki lai bnai ba la dep. Kane ka pisa ka kynthup ïa T.100 klur ba la pyllait ha u bnai Nailur bad sa T.104 klur ba la sam ha ka taïew ba la dep.
U Myntri Rangbah u la ong ba ka sorkar kan bteng ban kyrshan ïa ki samla, ki kynthei bad ki nongrep lyngba ki skhim bapher bapher. Ka jingsam ïa ki kali bad ka jingïarap pisa hapoh ki skhim CM Elevate, CM Assure bad CM Farm Plus la thmu ban pynlong ha Jengjal ha ka 22 tarik u Risaw, khnang ban ïarap ïa ki nongïoh jingmyntoi ban sdang ïa ki kam lajong bad ban kyntiew ïa ka kamai kajih.
Haba pynpaw ïa ka jingdonkam jong ki ophis treikam ha ki thaiñ nongkyndong, u Myntri Rangbah u la ong ba ki ophis Community and Rural Development Block ki don bynta kaba kongsan ha ka jingpyntreikam ïa ki skhim sorkar bad ban ai jingshakri ïa ki paidbah. Katkum ka jingong jong u, kumba 70 percent na ki kam pynroi bad ki jingmyntoi ba la pynpoi sha ki paidbah ki ïaid lyngba kine ki ophis.
“Ka jylla Meghalaya ka don 56 tylli ki Block, bad ka sorkar ka dang pyrshang ban pynbiang ïa ki jingtei ophis kiba biang khnang ban pynsuk ïa ka jingshakri paidbah.” U la kdew ruh ba ka ophis thymmai jong ka Rerapara Community and Rural Development Block ka dei kawei na kine ki jingpyrshang, namar ba kane ka Block kam shym la don la ka jong ka jingtei ophis naduh u snem 2014.
U Sangma u la ban jur ruh ïa ka jingdonkam ban pynbha ïa ka jingïoh ïa ki lynti syngkien kiba biang khamtam ha ki thaiñ Garo Hills. U la ong ba ka jingpynslem ïa ki projek surok NH-62 bad NH-217 namar ki jingeh ha ka jingïoh jaka bad ki kam ïadei bad ki khlaw ka dang long ka mat kaba donkam ban pynbeit. “Ka sorkar jylla ka dang ïakren bad ka Sorkar Pdeng ban wad ïa ki lad ban weng ïa kine ki jingeh,” u la ong.
Shuh shuh u la ong ba ka jingtyrwa ban shna ïa ka surok Siju-Chokpot ruh la dep phah lyngba ka Ministry of Development of North Eastern Region. Lada ka projek ka ïoh jingmynjur, kane ka surok kan pynsuk ïa ka leit ka wan hapdeng Siju bad Tura lyngba Chokpot, khamtam ïa ki paidbah bad ki ophisar kiba leit trei kam.
Ha kaba ïadei bad ka kolshor, u Sangma u la ong ba ka sorkar ka la ai T.5.50 klur ban kyrshan ïa ka jingrakhe ïa ka jingdap 50 snem jong ka Wangala. Kane ka jingïarap kan leit sha ka jingpynbha ïa ka jaka pynlong Wangala, ki surok bad ki jaka pynïeng kali, ryngkat bad kiwei ki kam pynkhreh ïa kane ka jingrakhe.
U Myntri Rangbah u la ong ba ka rukom pynroi jong ka sorkar ka dang ïaid katkum ka jingthmu bad ka jingangnud jong u Myntri Rangbah barim ka jylla, u P.A. Sangma, ha kaba ka bha ka miat jong ki paidbah bad ka jingmyntoi jong ka jylla ki dang long ki mat ba kongsan tam.
Ha kane ka jingïalang la wan ïashim bynta lang da u Rakkam A. Sangma, MLA ka Rongara-Siju, u Jim M. Sangma, MLA ka Rongjeng; u Sengchim N. Sangma, MLA ka Chokpot; u Deputy Commissioner ka South Garo Hills, Sumit Kumar Singh, bad kiwei kiwei.