Ka jingdon jong ka ophis IFAD ha Nonglait ka jingkyrmen ba khraw ïa ki paitbah nongrep

Mairang, Risaw 21 : Ka shnong Nonglait Eastern West Khasi hills district kaba hap ha ka Mawthadraishan C& RD Block ka la don naduh ki por mynhyndai bad haduh mynta ka la don palat laispah tylli ki long ïng.katei ka shnong ka don harud ka surok Parïong – Lawbyrtun bad ki paitbah nongshong shnong kiba don ha katei ka thaiñ ki dei kiba im da ka rep ka riang, ri jingri kum ki blang ,ki masi , ki syiar bad kiwei kiwei hynrei kiba ri sniang ki duna bha.
Ki mar rep ba kongsan jong ki paitbah nongshong shnong ha katei ka thaiñ ki long u riewhadem, u kba, soh phlang, ki jhur ki jhep bad kiwei kiwei. Kumta na ka bynta ban kyntiew ïa ka rep ka riang jong ki nongshong shnong ka International Fund for Agriculrue Development (IFAD) kawei na ki tnad trei kam kaba peit bad khmih kumno ban kyntiew ïa ka bha ka miat bad ka ïoh ka kot jong ki paitbah nongrep bad kaba la kyrshan pisa ruh da ki Bank kiba heh jong ka pyrthei ha ryngkat ka jingïadon bynta lang da ka tnad trei kam jong ka United Nation Organisation ka la sdang ban phai khmat sha katei ka thaiñ ha kaba ka la shna ïa ka ophis trei kam ha shnong Nonglait na ka bynta ban ïarap bad ai jinghikai ïa ki nongrep kumno ban pynbha shuh shuh ïa ka rep ka riang .
Nalor kata ka IFAD ka don ruh ïa ka thong kumno ban hikai ïa ki nongrep ba kin rep ï ki jait jingthung ba thymmai ba la wan rah symbai na kiwei pat ki ri.
Ha kaba ïadei bad ka jingshna ïa katei ka ophis jong ka IFAD ha ka shnong Nonglait na ka liang ki paitbah nongshong shnong haba ïakren bad u Nongthohkhubor jong u Mawphor k la pynpaw ïa ka jingsngew kmen kaba khraw ha kaba ki la ong ba ka jingdon jong katei ka ophis jong ka IFAD ka long ka jingkyrkhu kaba khraw ïa ki paitbah nalor ka jingdon jong kiwei kiwei ki tnad trei kam jong ka sorkar kiba peit ïa ka rep ka riang kum ka Agriculture ha Mairang bad Mawthadraishan Block ,Horticulture, Krishi Vigyan Kendra ha Nongshilong ka la nangpynsngewthuh shuh shuh ïa ki nongshong shnong ba ka rep ka riang ka dei ka ba kordor tam bad ba ki nongrep ki dei ki kynrad jong ka ïoh ka kot hapoh ka ri.
Kum ban pynkynmaw ba ha ki snem ba mynshuwa ka tnad trei kam jong ka IFAD ka la don ha West Khasi hills district ha kaba u bah James Kharkongor u dei u ophisar uba peit bad khmih ïa katei ka tnad trei kam kaba la neh da ki bun bun snem ha kaba ka rep ka riang bad ri jingri ka la sdang ban kiew sted bha hynrei ym tip na kano ka daw ba katei ka tnad trei kam ka la sangeh noh .
Ha kane ka kynt pat ka jingphaikhmat jongkatei ka tnad trei kam da kaba shna ïa ka ophis ha ka shnong Nonglait ka wanrah ïa ka jingkyrmen kaba khraw ïa ki paitbah nongshong shnong khamtam eh ïa ki shnong kiba hap ha Eastern West Khasi hills district naduh ki nongrep haduh ki nongri jingri bad kiwei kiwei .Kadon ruh ka jingkyrmen kaba khraw ba katei ka tnad kan long kum ka lynti kaban hikai ïa ki paitbah kumno ban sdang ïa ka rukom rep kaba kham bha bad pyrshang ban rep ïa ki jingthung kiba thymmai na kabynta ban kyntiew ïa ka ïoh ka kot bad ka kamai kajih jong ki.