Wer ka tnad Biotechnology ïaki skul, kolej bad ki riew paidbah ban shim bynta haka DESIGN for BioE3 Challenge

Nongpoh, Risaw 19: Ka tnad Biotechnology jong ka Ministry of Science & Technology jong ka sorkar India, kala wer ïaki skul ba kin phah ïaki khynnah naduh klas 6 haduh klas 12 ba kin shim bynta haka Nationwide D.E.S.I.G.N for BioE3 Challenge naka bynta ki skul kiba hap haka Category 1 bad ki Open Category naka bynta ki samla pule college, ki riew paidbah, ki nongwad bñiah ban mihkhmat ïaka jylla bad kumjuh ruh haka National level.
Naka bynta ki khynnah skul ki ban ïashim bynta, Ki nonghikai science, ki nongïalam bad ki Eco Club Coordinator ki dei ban pynbeit ryntih ba ki khynnah kin phah ïaki durkhih (60-120 seconds) bad ka jingmut haka portal innovateindia.mygov.in/bioe3/ shuwa ka 20 tarik Risaw haduh ka por 11:59 baje mynmiet bad kam don kano kano ka khusnam pisa hynrei ka syrnod National Certificates of Merit ryngkat ka muhor jong u Myntri ka sorkar pdeng.
Katba haka open category ki riew paidbah, ki samla pule college, ki nongwad bñiah bad kiwei kiwei ki lah ban phah ïaka jingmut ba ïadei bad ka BioE3 Policy Pillars kumba 1500 kyntien haka portal www.bric.nic.in/bioe3challege bad kan don ruh ka khusnam kaba 1 lakh uwei naka bynta ki 10 ngut kiba wan hakhmat haka wat ba nyngkong bad ki dei ban phah shuwa ka 20 tarik Risaw haduh ka por 11:59 baje mynmiet.
Ka thong jong ka sorkar India lyngba ka tnad Biotechnology jong ka Ministry of Science and Technology ban pynlong ïaka D.E.S.I.G.N for BioE3 Challenge halor ka phang Empowering Youth to Solve Critical Issues of their TIMES ka long ban kyntiew ïaka ri India haba ïadei bad ka bioeconomy.