Ka jingleit pynïasoh sha ka BJP kadei hadien ka jingkular ba la ai da u Amit shah halor ki 5 tylli ki mat : Pius Marwein

Shillong, Risaw 17 : U MLA ka BJP na Ranikor, u Bah Pius Marwein, u la ong ba ka rai jong ki phra ngut ki MLA barim ka UDP ban pynïasoh bad ka BJP ka la wan hadien ka jingai jingkular jong u Myntri ka Tnat Kam Pohïing ka Sorkar Pdeng, u Amit Shah, halor san tylli ki mat jingdawa kiba la slem bha jong ka jylla Meghalaya.
Haba pynpaw ïa ka jingsngewnguh ïa u Lamphang ka Ïingdorbar Thawaiñ, u Thomas A Sangma, uba la ai ka jingithuh ïa ka jingpynïasoh jong ki MLA bad ka BJP katkum ka Khyrnit ba Shiphew (Tenth Schedule), u Bah Marwein u la ong, “Ka jingpynïasoh jong ki phra ngut ki MLA bad ka party kaba heh tam ha ka pyrthei kam shym la long kaba suk.”
Une u nongmihkhmat, uba la shah jied ar sien kum u MLA bad MDC ha ki 20 snem jong ka jingïaid lynti ha ka saiñ pyrthei, u la ong ba ka jingpyndep ïa ki jingkular ka long kaba eh haba ki mat kiba kongsan ki hap hapoh ki aiñ jong ka Sorkar Pdeng, bad haba ki don shabar jong ka party kaba bat ïa ka bor synshar ha ka ri.
U la kdew ba ki san tylli ki mat jingdawa ba kongsan jong ki ki kynthup ïa ka Meghalaya Residents Safety and Security Act (MRSSA), ka jingpynrung ïa ki ktien Khasi bad Garo ha ka Khyrnit kaba Phra (Eighth Schedule) jong ka Riti Synshar ka Ri, ka kam tih dewïong, ka jingkynriah ïa ka Harijan Colony bad ka jingithuh ïa ka Seng Khasi bad Sein Raij kum ki kynhun rit paid.
“Ngi shaniah ha ka jingkular jong uwei u nongïalam uba don ïa ka nam bad ka bor ha ka ri, bad ha kaba kut ngi la rai ban pynïasoh bad ka BJP hapoh ka jingïalam kaba stad jong u Myntri Rangbahduh ka ri, u Narendra Modi,” la ong u Bah Marwein, haba kdew ïa ka jingai jingkular jong u Amit Shah hadien kiba bun ki jingïakren ha Delhi.
U Bah Marwein u la ong ba ka kynhun jong ki ka la lyngngoh ïa ka jingbym don jingeh ban ïoh ïakynduh ïa ki nongïalam ka Sorkar Pdeng, kaba pher na ka por ba synshar ka Congress, ha kaba, katkum ka jingong jong u, “Ki nongïalam na ka jylla jong ngi ki hap ap da ki snem ban ïoh ïakynduh ïa uwei u Myntri ka Sorkar Pdeng.”
U la ai khublei ruh ïa u nongïalam ka BJP ha ka thaiñ Shatei Lam Mihngi ba dei ruh u MP, u Sambit Patra, uba la shah shkor ïa ki jingdawa jong ki da ka jingïaishah bad uba la rah ïa kine ki mat sha ki tnat treikam sorkar kiba dei peit.
U Bah Marwein u la ong ba kine ki phra ngut ki MLA kin leit sha Delhi shen ban ïakynduh ïa u Amit Shah bad kiwei pat ki Myntri ka Sorkar Pdeng, khnang ban sdang ïa ki projek kam pynroi. Shuh shuh u la ong ba ka jingpynpoi ïa ki kam pynroi sha ki nongkyndong bad ka jingpynsngewthuh ïa ki skhim jong ka Sorkar Pdeng kin long ki mat ba hakhmat eh.
U la bynrap ba ki MLA kin trei lang ha ka jingïatylli bad u Myntri Rangbah ka jylla, u Conrad K Sangma ha ka jylla.