Shong jingïalang ka GTCC ban ïakren halor ka jingpynkhreh ïa ka 39th National Games 2027 ha Meghalaya
SHILLONG, Risaw 18: Ki dkhot jong ka Games Technical Conduct Committee (GTCC) na ka bynta ka 39th National Games, ka ban sa long ha Meghalaya ha u snem ban wan, kata 2027, ha ka 16 tarik Risaw ki la pynlong ïa ka jingïalang ha Indian Olympic Association (IOA) Bhavan, New Delhi, ban ïakren ha kaba ïadei bad ka jingpynkhreh ïa kane ka lympung.
ïa kane ka jingïalang la pynïaid da ka Sunaina Kumari, Chairperson ka GTCC, ha ka jingïadon lang u Maninder Pal Singh, Sec. General-Cycling Federation of India, bad u Dushyant Sharma-President, Jammu & Kashmir Olympic Association, baroh ar ki dkhot jong ka GTCC, lem bad u bah John F. Kharshiing, Working President ka Meghalaya State Olympic Association (MSOA).
Ka jingïakren ka long halor ka lynti jong ka jingpynkhreh bad ka jinglong ba la khreh jong ka Meghalaya baroh kawei ban pdiang bad pynlong ïa ka sienjam kaba 39 jong kane ka lympung bah jong ka ri India, kaba la tyrwa ban sdang ha ka 10 tarik u Lber 2027.
Ha kane ka jingïakynduh, u bah John F. Kharshiing u la batai lyngkot halor ka jingïaid shaphrang jong ka jingpynkhreh ba la shim da ka Jylla sha ka Chairperson ka GTCC.
U Bah John, u la pynsngew ba ka Meghalaya ka la ïaid shakhmat katkum ki por ba la buh bad ka dang sah ha ka lynti ban pynthikna ïa ki jingpynkhreh ba donkam na ka bynta ban pynlong ïa ka lympung kaba jop. U la pynpaw ruh ïa ka jingkular jong ka Jylla ban ïatreilang bad ka IOA, ka GTCC, ka Sorkar India, bad baroh ki synjuk Olympic jong ki jylla kiba ïashim bynta ban pynthikna ïa ka jingïaid beit ïaid ryntih bad ka jingpynlong kaba jop ïa kane ka lympung bah jong ka ri.
Ha kane ka jingïalang, la pyntip ruh ba kin don san ngut ki dkhot ka GTCC ki ban wan sha Shillong, Meghalaya ha ka taïew ba nyngkong jong u bnai Naiwieng 2026 ban dang ïakren bad bishar bñiah ïa ka jingpynkhreh jong ka Jylla na ka bynta ka 39th National Games.
Ka National Games kaba 39 kan long ka histori na ka bynta ka jylla Meghalaya bad ka thaiñ shatei lammihngi baroh kawei. Lah ban pynkynmaw ba kham mynshwa ka Manipur ha u snem 1999 bad ka Assam ha u snem 2007 ki la ïoh ban pynlong ïa ka National Games bad ka jylla Meghalaya kan long ka jylla kaba lai jong ka thaiñ ka ban ïoh ïa kane lad.