Jowai, Risaw 15: Ka National People’s Party (NPP) 2-Jowai Constituency mynta ka sngi 15 tarik u Risaw, 2026 kala pdiang burom ïaki dkhot kiba la rung thymmai sha ka Party da u MLA ma Wailadmiki Shylla uba la pynskhem bad pynkup ïa ka Muphlor jong ka Party sha ki haka jingïalang bala pynlong ha District Library Auditorium Mynthong, Jowai.
Ïa ka jingïalang la pynïaid da u ma D. Lamare, ha kaba la ïoh ruh ka jingkren lamphrang da u District President ma O. Lamin, kumjuh ruh na ki dkhot bala rung thymmai kiba la pynpaw ka jingsngewkmen ban don bad ka party NPP kaba la seng napoh ka jylla hi bad kaba donkam ïa ki mynta kila kular ban trei shitom ban pynkhlaiñ shuh shuh ïaka party.
Na ka liang u ma Wailadmiki Shylla uba dei u MLA ka 2- Jowai Constituency bad u myntri ba dei peit ïa ka koit ka khiah, ka kam ïalehkai Sports bad kiwei de haba ai jingkren ula pynpaw ka jingïakhublei ïa baroh kiba la wan ban pynïasoh thymmai sha ka Party bad kumjuh ïa kiba rim, da kaba u ong nangne shakhmat kin ïatreilang ban wanrah ïa ki kam pynroi kiba bun.
Ula kyntu kum ki dkhot ka Party, dei ban pynleit jingmut ïa kane ka By-Election MP jong ka Shillong Parliament namar kam slem shuh haka 26 tarik yn pyndep ïa ka SIR bad ïaka tarik yn sa pynbna shen, ula khot ïa baroh ki dkhot ban ïawan sha ka jingïalang u kyrtong MP ka Party ha Mihmyntdu Lumpyrtuh haka 22 tarik mynta u bnai haka por janmiet.
Shuh shuh u ma Wailad ula pynsngew ïa ki kam pynroi hapoh ka Jowai naduh ka Jowai Water Supply Scheme, ka Iawmusiang Shopping Complex, ka Mini Secretariat, ka madan ïalehkai phutbol bad athletic Ground ha Kiang Nangbah, ka MCH ha Jowai, ka jingïarap pisa ïa ki nonghikai College ha Thomas Jones, ka Extension ïa ka Building jong ka Kiang Nangbah, ki surok hapoh sor bad ki surok By-Pass nalor kiwei de ki kam pynroi.
Ula pynsngew ruh ïa ka jingshañiah ïaki nongkyrshan ka Constituency kiba la jied ïa u naduh u snem 2018 kum u MLA hynrei wat lada u dei na thaiñ nongkyndong ula trei khlem da ñiew shilliang ban pynïaid ïa ki kam pynroi hapoh ka Constituency. Ula khot donkam mynta ïa ki nongrep ban trei lang ïa ka lyngkha kaba heh bad kaba ïar.
La ïathuh da ki nongïalam ka party kila don haduh 1500 tylli ki Form kiba la pyllait mynta ka sngi ban pynrung kum ki dkhot thymmai sha ka Party bad kiba sah na kine ki Form yn sa pyndep ha kine ki sngi ban wan.
