Hap ban buh miaw u MDC ha kamra ha MDC Hostel ba satah ki khnai baheh baheh

Shillong, Risaw 15: U Executive Member ka Khasi Hills Autonomous District Council (KHADC) uba bat ïa ka pla tyngka u Bah Seiborlang Warbah u la pyntip ba ka Executive Committee kala mang T. 10 lak na ka bynta ban maramot ïa ka MDC Hostel.
Ïa kane u Bah Warbah u la jubab ha ka kynta kylli jingkylli ha ka sngi kaba ar kaba dei ruh ka sngi ban kut ka Dorbar Tlang kaba ar sngi jong ka KHADC, kaba la buh jingkylli da u MDC ka Mairang u Bah Equator L Nongrang.
U Bah Equator haba buh ka jingkylli u kwah ban tip ba la ka Executive Committee ka mang tyngka ne em na ka bynta ban maramot ïa ka MDC Hostel bad ka jubab na u EM ka long hooid.
Shuh shuh u la ong ba ki jingtip ba bniah kadei na ka Grant No 6, Head of Account: Legislative Department.D Contingency, Repair/ Maintenance of MDC Hostel na ka mang tyngka 2026-2027.
Na ka liang u MDC u la pynsngew ruh hapoh ka ïing ba u hap ban buh da ar tylli ki miaw ha kamra jong u ha MDC Hostel namar ba satah ki khnai baheh baheh bad ym tang katta hynrei ki mih ruh ki phlang bad ki kynbat kiba neh khlem pynkhuid hapoh MDC Hostel.
Na ka liang ka Kong Grace Mary Kharpuri kaba dei ka MDC na Nongshken kala buh jingkylli la ka ophis ka bthah ne em ia ki nongtrei ban pynkhuid namar ki phlang ki mih bad kumno ki briew ba nabar kin ong bad la ka ophis ka don ne em ïa ki superviser.
Na ka liang u Chief Executive Member (CEM) u Bah Winston Tony Lyngdoh haba ïarap ban jubab u la ong, Donkam ban long adkar bad ong ruh ba kin sa peit ia kane da kaba bynrap ruh ba ki superviser ki don bad ki ophisar bapher bapher bad ngin sa bthah ïa ki.