Shillong, Risaw 15 : U Lamphang ka Ïingdorbar Thaw Aiñ ka Jylla, u Thomas A. Sangma, u la pynpaw ïa ka jingsngewsih halor ka jingkhlad noh jong u Chamberline B. Marak, uba la shakri ïa ka jylla kum u Myntri Sorkar barim bad uba la jop saw sien kum u MLA na Bajengdoba.
U Chamberline B. Marak u la sdang ïa ka jingïaid lynti jong u ha ka saiñpyrthei ha u snem 1983, da kaba ïakhun ïa ka ilekshon hapoh ka tiket jong ka seng Congress. Hadien kata, u la jop saw sien lynter kum u MLA na Bajengdoba bad u la shakri ruh kum u Myntri Sorkar, ha kaba u la bat ïa ki tnat treikam bapher bapher, kynthup ïa ka tnat Pule Puthi.
Ha ka khubor sngewlem ba la pynmih da ka Secretariat jong ka Ïingdorbar Thaw Aiñ, u Thomas A. Sangma u la pynpaw ïa ka jingsngewsih kaba khraw halor ka jingkhlad noh jong une u nongïalam saiñpyrthei uba la don ka jingshemphang bad ka jingïaid lynti kaba jrong ha ka saiñpyrthei.
U Lamphang u la kynmaw burom ïa u Marak kum u nongïalam ba pawkhmat, uba la tip na ka bynta ka jingtip kaba jylliew ha ka saiñpyrthei, ka sap kren paidbah bad ka jingstad ban pyndonkam bha ïa ka ktien Phareng.
“Ha ka jingïaid lynti jong u ha ka jingshakri paidbah, u la noh synñiang shibun ha ka roi ka par bad ka bha ka miat jong ki paidbah ka Meghalaya,” la ong u Thomas A. Sangma.
Ha ka kyrteng jong baroh ki dkhot ka Ïingdorbar Thaw Aiñ, u Lamphang u la phah ïa ka khubor sngewlem sha kiba haïing hasem jong u Marak, da kaba duwai ba kin ïoh ïa ka bor bad ka jingkhlaiñ ban ïakynduh ïa kane ka jingduh kaba khraw, bad ba ka mynsiem jong u ba la khlad kan ïoh ïa ka jingshongthait bymjukut.
