Ai jingmynjur ka sorkar ïa ka Meghalaya School Education (School Complex) Rules, 2026

Shillong, Risaw 13: Ka Kynhun Myntri sorkar jong ka Jylla Meghalaya ka la mynjur ïa ka Meghalaya School Education (School Complex) Rules, 2026, ban pynbeit ryntih ïa ka jingïakylla jong ki khynnah skul hapdeng ki skul bad ban pynbha ïa ka lad ban ïoh ïa ki jingpule ha ka secondary education ha baroh kawei ka jylla.
Haba pynbna ïa kane ka rai, u Myntri Rangbah ka Jylla u Conrad K. Sangma u la pynpaw ïa ka jingbym ïahap hapdeng ka jingdon jong ki skul Lower Primary bad ki Higher Secondary School ha Meghalaya, kaba ju buh jingeh ïa ki khynnah skul ban leit sha ki klas kiba kham heh.
“Ka Jylla Meghalaya ka don haduh 9,244 tylli ki Lower Primary skul, hynrei ki don tang 532 tylli ki Higher Secondary.Kane ka jingïapher bunsien ka buh jingeh ïa ki khynnah ban ïoh admission bad ka pynbor ïa ki ban ïaid lyngba bun ki rukom admission katba ki nang ïaid shakhmat lyngba ki skul,” ong u Sangma ha ka jingthoh ha ka X.
Hapoh kane ka rukom treikam kaba thymmai, yn pyniasoh ïa ki lower bad upper primary schools bad ban pyniasoh bad ki secondary bad ki higher secondary skul ban thaw ïa ki lynti iaid kiba kham suk bad ban pynduna ïa ki jingeh ha ka liang ka bor synshar.
“Lyngba ka School Complex framework, ngi thmu ban pyniasoh ïa ki skul Lower bad Upper Primary bad ki skul Secondary bad Higher Secondary kiba don hajan, kaba pynlong ïa ka jingkylla kaba suk hapdeng ki klas bad pynduna ïa ki jingeh ha ka liang ka synshar khadar ïa ki khynnah skul”, la ong u Myntri Rangbah ka Jylla.
Ka jingthmu ka thmu ruh ban pynkhlain ïa ka jingsam ïa ki jingtip hapdeng ki skul. Ki Higher secondary kin long kum ki skul nodal ne model, kiba pynsuk ban ioh ïa ki tiar hikai, ki jaka test saian, ki jingtei digital, ki jaka ialehkai bad ka jingstad hikai ba kyrpang na ka bynta ki skul ba marjan.