Namar ba la duna ka jingpynmih : 4 haduh 5 tyngka shikilo kiew dor u jhur biskot ha kine ki sngi ( Bah Tesar Marweiñ, Reporter)

Mairang, Risaw 13: Ka jinghap slap mynta u snem ka duna haduh katta katta haba ïanujor bad ki snem ba la dep namar katkum ka jingbatai jong ka tnad kaba peit ïa ka jinglong ka suiñ bneng la ong ba ka jingïoh slap mynta u snem ka duna haduh 50% na kaba ju ïoh.
Ka jingduna jong ka jinghap slap ka ktah bha ïa ka rep ka riang khamtam eh ïa u biskot uba dei uwei na ki marrep uba donkam bun bha ka um kumta ka jingpynmih biskot ka duna bha haba ïanujor bad ki snem ba la dep.
Nalor ba ka jingpynmih biskot ka duna ki nongkhaiï ruh ki khñiot ïa ka dor haduh ba ki nongrep ki la thnum bad bynñiaw bad kiba kham bun ki la hap ban shu ai bam sniang. Ki nongrep biskot na ki thaiñ Myrïaw, Bynther, Umjei, haduh Nongkasen Eastern West Khasi hills haba ïakren bad u nongthohkhubor ki la ïathuh ba naduh u bnai Nailar haduh u bnai Nailur ba la dep ki nongkhaïï biskot ki la leh mon shaba palat ha kaba ka dor ba ki thied na ki nongrep ka long shi tyngka haduh ar tyngka shi kilo hynrei kito kiba la rep bun bad kiba la ïoh da ki hajar kilo shisien kheit te ki pynïaid ïew hynrei kito kiba kham duna ka jingïoh bun kiba ai bam sniang namar kim sngew myntoi ïa ka dor ba ki nongkhaïï ki thied.
Kitei ki nongrep ki la ïathuh ruh ba ha kine ki sngi namar ba la sdang duna ka jingpynmih biskot ka dor ka la sdang kiew sha ka saw haduh san tyngka shi kilo kata ruh kat kum ki jaka. Nalor kata ki la ong ruh ba ha kine ki sngi wat lada ka dor kan kiew man la ka sngi ruh kam don jingmut shuh namar ka aïom slap ka la kut, ka aïom ba u thah bad ka ïor kin hap ka la jan, ki jyntang biskot bad ki sla ki la sdang ban ïap stai kumta kam don jingmut shuh ban pynkiew dor katno katno ruh.
Shuh shuh kitei ki nongrep ki la ong ba ki da kwah eh ba ha ki bnai ba u biskot u soh bha kata naduh u bnai Jylliew haduh u bnai Nailar ba ki nongkhaïï kim dei ban khñiot palat ïa ka dor bad la kumno kumno ka dor ka dei ban long shiphew tyngka shaneng khnang ba ki nongrep biskot kin ym duhnong palat.
Ki la kyntu ruh ïa ki bor sorkar kiba dei peit ïa ka khaïï ka pateng ba ki dei ban tuklar halor ka jingkhñiot beiñ jong ki nongkhaïï ïa ki nongrep namar lada ka jingshah khñiot beiñ jong ki nongrep biskot kan dang ïai bteng na ka por bad ha ka por ba ki nongrep biskot ki hap ban pynlong da ki jingïakhih.