Nongstoiñ, Risaw 13: Ka seng Hynñiewtrep Youths Council Maweit Circle, ha u kyrwoh khubor ba la pyllait mynta sngi, ka pynpaw ka jingdiaw mynsiem namar ka rukom ñiah kali kaba pynher sted palat jong ki trok bad wat ki kali ruh ha shilynter ka surok Maweit.
Ka seng ka la ong ba ha ka jingshisha ka sngew dei ban ai khublei kyrpang ïa ka Sorkar Meghalaya, kaba la pynurlong ban pyntrei ïa ka surok Nongstoiñ sha Maweit kaba la sahteng la slem eh. Kane ka surok ka la ïarap shibun ïa ki paidbah ka thaiñ, watla kumba long mynta bun jaka ki la sdang ban jot ban pra.
Hynrei, ha kine ki sngi ka seng ka la ïoh ïa ka jingud jingnam na ki paidbah ka thaiñ, halor ka rukom ñiah kali kaba pynher sted palat kaba pynsyier mynsiem ïa kiba leit ba wan. Kumta, na ka liang ka HYC Maweit circle, ka buh ka jingkyrpad bad ka jingmaham sha baroh ki trai kali, ki nongbuh kali bad ïa ki draibar naduh ki kali rit haduh ki kali heh kiba ïaid lyngba ka surok Nongstoiñ sha Maweit:
Ka seng ka kyrpad ïa ki nongñiah kali ba kim dei ban ïaid sted palat khamtam ha ki jaka paidbah, kum ha ki jaka shnong ne hajan ki skul. Baroh ki nongñiah kali ki dei ban ïa ñiah don akor, ki dei ban ïa burom markylliang naduh kali rit haduh ki kali heh ruh kumjuh.
Ka seng ka kyrpad ïa ki nongñiah ïa ki kali heh khamtam eh ba kim dei ban buh kali mawjam ha ki surok, namar kane ka lah ban buh jingeh ïa ki kali rit bad kiwei bad ka lah ban jia ki jingjia aksiden.
Na ka liang ka Seng kan ïai peitngor bad khmih nangne shakhmat. Lada lap ïa kiba bym burom ne leh khlem akor, na ka liang ka seng kam banse hap ban ai jingsneng. Ka seng ka wer ïa ka jingïatreilang khnang ba kan nym don kano kano ka jingjia ba sngewsih ha shilynter kane ka surok.
