Wat hadien ba shah tam shi kol, ïakhun tyngeh ka Nongkseh ban pynliem ïa ka Sawmer da 4-2 kol, rung suk sha ka SF Super Cup

Shillong, Risaw 13 : Ka Nongkseh ka la lah ban ïa ksaid tyngeh na ka tyngam jong ka nam rem haduh ba kan da ïoh pynliem kylla ïa ka Sawmer SC da 4-2 kol, ha ka jingïakhun ïa ka playoff ba nyngkong ka lympung ïalehkai ka SSA Super Cup, ba la long ha SSA Stadium, hynne ka nohphai sngi.
Ïa ki kol ka Nongkseh SSCC la thep da u Hardy Cliff Nongbri (54′, 71′) bad Shano Tariang (67′, 69′), katba ïa ki artylli ki kol ka Sawmer SC la thep da u Khrawkupar Tamu (37’P) bad na u Bickyson Kharkongor (57′).
Da kane ka jingjop ka pynlong ïa ka Nongkseh SSCC ba kan jam pat sha ka semifinal ha kaba kan khreh ba kan ïakhun pyrshah ïa ka lahduh ka SPL 2026 ka Mawlai SC kaban long ha ka sngi Thohdieng jong ka taiew.
Ka jingïoh jong ka Sawmer ban thep ïa ka kol nyngkong ka dei ha ka por ba u Bickyson u la ïoh ïa kawei ka kabu ksiar ban shut jam bha ïa ka bol bad u Daraphun Talang rang ap kol ka Nongkseh u la hap ban khmih bniah bha ïa kane ka bol ha shwa ba un ïoh ban kyrda ïa ka ban pyllait na ka jingman.
Hadien kane, ka Sawmer ka la ïoh ïa ka kabu ba kan shut ïa ka penalty, kaba hangne u Khrawkupar u la tur shakhmat bad ban shut na kyndong bad nalor bha ïa ka bol ban pynkhih ïa ka jar.
Hadien kane, ka Nongkseh ka la pyrshang ba kan wanphai biang ïalade sha ka thong ïakhun hadien ba ka la shem bad ïohi ba ka kynhun ïalehkai ka Sawmer ki la ieng ïakhun tyngeh bha ha kane ka kynti, bad hapoh shiphew minit ka kylla miet, ba ka la ïoh ïa ka kabu kaba paka ban pynphai ia kane ka shi kol ba ka la shah tam lyngba u Hardy.
Ha ka por ba ka Nongkseh ka dang mut dur ba ka la lah ban tehlakam ïa kane ka jingïakhun, jrain khih biang ka jar jong ka, hadien ba u Bickyson u la shut jam ïa ka bol kham na kyndong bha ka diengkol bad ka bol kluk ka la ïoh ba kan rung beit shapoh ka kol.
Pynban ym slem hadien kane ba ka kynhun ïalehkai ka Sawmer SC kim shym lah shuh ban bteng ïa ka rukom ïalehkai ba khlain jong ki kumba ki lamkhmat dang sdang katno tam lei lei hadien ba la pynrung madan ïa u Shano bad u Chesterpaul, kaba hangne shu dain bad dain ka Nongkseh ka la ïoh ban thep ïa ki kol ki jong ka.
Ka dawbah ïa ka Sawmer SC ban shah thep ka dei ba ki rangap dien jong ka, kim shim lah ban ïada pura ïa la ka kut ïalehkai jong ki tad haduh ba kin hap ban pdiang pat ïa kane ka jingshah rem bad kaban dei artad ka jingïakhun kaba khatduh ïa ka ha kane ka samoi ïalehkai ba mynta ka snem.
Ka jingiakhun ïa ka playoff kaba ar kan dei pat lashai ka sngi hapdeng ka Langsning FC pyrshah ïa ka Meghalaya Police FT, bad kiba jop na kane ka jingïakhun kin khreh ban ïakhun pat ïa ka semifinal kaba ar pyrshah ïa ka Shillong Lajong FC kaban long ha ka sngi Saitjain jong ka taiew.