Shillong, Risaw 13 : U Bah Wallambok Lyngdoh, General Secretary jong ka Meghalaya Sport Climbing and Mountaineering Association (MeSCMA), u la lah ban kiew sha kliar jong u lum Mt. Bhagirathi II, uba jrong 6,512 meter, ha ka thain Garhwal Himalayas jong ka jylla Uttarakhand.
Halor kane, na ka liang ka MeSCMA ka la pynpaw ïa ka jingsarong halor kane ka jingjop jong u, kaba long ka jingkiew lum kaba 18 jong u na ki 25 tylli ki jingïaid lynti kiew lum kiba u la shim bynta haduh mynta.
Ha kane ka jingkiew lum, u Bah Wallambok u la rah ïa ka lama jong ka MeSCMA, ka lama jong ka Sorkar Meghalaya bad ki jingkynmaw burom ïa ki nongïaleh laitluid jong ka Meghalaya sha kliar jong une u lum Himalaya.
Ka President jong ka MeSCMA, ka Kong Malviancy Shabong ha ka kyrwoh, ka la ai jingïaroh ïa u Bah Wallambok halor kane ka jingjop, da kaba ong ba kane ka pyni ïa ka jingaiti lut, ka jingïaineh, ka jingshlur bad ka jingieit jong u ïa ka kam kiew lum.
Ka la pynpaw ruh ba kane ka jingjop kan long ka jingai mynsiem ïa ki samla bad ki nongkiew lum kiba dang khie dang san ha Meghalaya, da kaba pyni ba ka jingkut jingmut, ka jinglong kiba don akor bad ka jingshlur ki lah ban ïalam ïa ki sha ki thong kiba jrong.
U Mt. Bhagirathi II, uba jrong 6,512 meter, u dei uwei na ki lum ba pawnam ha ka thain Garhwal Himalayas. U don ha ka thain jong ka Gangotri Glacier, kaba long ka tynrai jong ka wah Bhagirathi, kaba long shi bynta jong ka lynti ïaid jong ka wah Ganga.
Une u lum u pawnam namar ki mawsiang kiba jrong, ki bynta ba kah da u thah, ki glacier bad ka jaka lum kaba eh ban kiew. Ka jingkiew sha kliar jong u ka donkam ïa ka bor met, ka sap kiew lum, ka jingkhlaiñ ka bor pyrkhat, ka jingïatreilang bad ka jinglah ban shim ïa ki rai kiba dei ha ki jinglong mariang kiba eh.
Na kliar jong u Bhagirathi II, ki nongkiew lum ki lah ban ïohi ïa kiwei pat ki lum bah Himalaya kiba don sawdong, kynthup ïa u Kamet, Abi Gamin, Satopanth, Vasuki Parvat, Chaukhamba massif, Sudarshan Parvat, Kedar Dome, Kedarnath, Thalay Sagar, Nandi, Meru bad Shivling.
Katkum ka histori jong ka kam kiew lum, ka jingkiew kaba nyngkong sha kliar jong u Mt. Bhagirathi II la pynlong ha u snem 1933 da ki nongkiew lum na Austria, u Edi Ellmauthaler bad u Toni Messner. Naduh kata, kiwei pat ki kynhun kiew lum ki la wad ïa ki lynti kiew bapher bapher jong une u lum.
Ka MeSCMA ka la pynpaw ïa ka jingkyrmen ba u Bah Wallambok Lyngdoh un dang ïoh ban kiew sha ki kliar lum kiba kham jrong bad ban wanrah shuh shuh ïa ka nam bad ka burom ïa ka Meghalaya lyngba ki jingjop jong u ha ka kam kiew lum.
