Khliehriat, Risaw 12 : Ki pulit jong ka District Police Force, East Jaiñtia Hills District hynne ka miet jong ka 12 tarik risaw ha ka por 1 baje miet synia ki la ioh kurup ïa ki drok na kawei ka kali kit nongpang (Ambulance) Maruti Ecco, kaba don u registration number ML-13-B-1459, kine ki drok ki shong dor T1.5 klur tyngka.
Katkum ki khubor ba la pynllait da u Superintendent of Police East Jaiñtia Hills District, u Shailendra Bamaniya, IPS, la ong ba ki pulit ki la pynap ktem lypa ha ka dong Damcherra ha Kuliang kaba hap hapoh Umkiang Police Patrolling Post bad ki la ioh bat ïa kane ka kali Maruti Ecco bad hadien ka jingkhynra ki pulit ki la lap ba don 27 tylli ki synduk sabon ba la thep da ki drok heroin bad ki drok ki don ka jingkhia kumba 409.89 grams, kane ka kali Ambulance ka dei kaba dang wan na ki thaiñ Silchar, Assam bad thmu ban leit hsa Guwahati hynrei ynda la poi ha ka jaka ha Damcherra ha ka por shiteng miet synia ki pulit ba la pynap ktem ki la ioh bat noh ïa kane ka kali bad ki don saw ngut ki briew kiba shong ha kane ka kali kiba la tip kyrteng kum u Alom Hussain Laskar, u Nazim Uddin Burbhuiya, u Manir Hussain Mazumdar bad kawei ka kynthei ba kyrteng ka Hashina Mamata Choudhury kiba dei na Silchar, Assam, ha kaba ïadei bad kane ki pulit ki la registrer ïa ka ejahar ha Lumshnong Police Station, Case No. 39(10)2026 U/s 8(c)/21(c)/29 NDPS Act.
