Ujor ejahar ha Raliang PS bad suba ba leh ki breiw na ka shnong Khatkasla

Jowai, Risaw 11: Kawei ka jingjia ba sngewsih kala jia ïa ka kong Toieid Iaka Papiah, kaba shong ba sah haka shnong Tum Tum, marjan bad ka shnong Sahsniang, West Jaiñtia Hills District, ha kaba la suba jur ba ki runar kiba ym lah ban tip ki la wan ban thang dusmon ïa u Kba ba dang shu dep ban ot.
Ka kong Toieid Iaka, ka la ïathuh ba ka jaka rep jong ka, ka dei kaba don ha Shilliang Ka Wah Myntang, ha ka jaka kaba la tip kum ka “Nohkrei”, ha kaba la juh thung ne rep Kba na ka bynta ban kamai jakpoh.
Hadien ba ka kong Toieid, ka ladep ban ot bad lum ïa u Kba, ha ka 9 tarik u Risaw, 2026, ka la buh ïa u Kba ha kawei ka sem ne ka trep ba shipor kaba la shna bad tap plastic hajan katei ka jaka rep kumba juleh manla u snem, na ka bynta ban shoh ïa u kba bad hadien kata ban rah sha la ïing. Hynrei khlem poi pyrkhat ba ha ka por kumba 8 baje mynstep jong ka 10 tarik Risaw, ka la ïohi ba la don ba thang dusmon ïa une u kba uba ka la pynlum ne buh ha katei ka trep, ha kaba ka ding ba klang ka la bam ïa u Kba ba dang shu dep ot.
Halor kane ka jingjia ka kong Toieid ka la pynpaw ïa ka jingsngewsih bad ka jingduhnong ba khraw ïa ka bad ka ïing ka sem jong ka hi, namar ka jingduh noh ïa u Kba uba ka la trei shitom baroh shi snem ban pynmih. Ka dor kaba la antad jong u kba ba la julor ka long kumba ?40,000/- (Sawphew Hajar Tyngka), hynrei kane ka dor ka dang hap ban bishar bad pynshisha bniah.
Watla haduh mynta ka kong Toieid ka la ong, “Ba ym pat lah ban ithuh ïa u briew ne ki briew kiba donkti ha kane ka kam be-aiñ, hynrei ka don ka jingsuba kaba jur ba don ki briew na ka shnong Khatkasla kiba lah ban donkti ha kane ka kam runar. Kane ka jingsuba jong ka namar ka lah ban mih na ki jingjia kiba la jia mynshwa, ha kaba la suba ba ki nongshong shnong ka Khatkasla ki donkti ha ka jingkhlong bad pynjulor ïa ki mar rep jong ki nongrep ka shnong.
Ha ka jingïadei bad kane ka jingjia na ka liang ka kong Toieid mynta ka sngi 10.10.2026, kala leit ban buh da ka FIR ha Raliang Police Station, West Jaiñtia Hills District, bad kala kyrpad jur ruh ïa ki bor jong ka aiñ ban tokit bad thwet ïa kiba donkti ha kane ka kam runar.
Ïa kane ka khubor la phah da u Secretary bad Chairman ki hynriew shnong, kiba kynthup ïa ka shnong Tum-Tum, Sahsniang A, Sahsnaing Saidthad, Iongkasaro, Thangthring bad Umsalait.