Byrngem pynjur jingïakhih ki nonghikai lada ka sorkar kam lah pynbeit ïa ki mat jingdawa jong ki

Shillong, Risaw 11: Haba kyntait ïa ka jubab jong ka tnad pule puthi halor ki mat jingdawa, ki nonghikai hapoh ka shatri Khasi Jaiñtia Deficit School Teachers Association (KJDSTA) ki la ong ba kin pynïaid shakhmat da ki prokram jingïakhih lada ym lah ban pynbeit mardor ïa ki mat jingdawa.
Halor kane u president ka KJDSTA u Babu Bosswell Pala u la ong ba ka jubab ba la soi da u Joint Secretary Bah D Lyngdoh, la ïoh pdiang ha ka por 9 baje mynmiet jong ka 8 tarik Risaw lyngba ka WhatsApp Account jong u Vijay Kumar Mantri kaba dei ruh ka jubab halor ka dorkhas ba la ai lang da ka KJDSTA bad ka GHDSTEA ha u Myntri Rangbah ka Jylla ha ka 25 tarik Nailar.
Da kaba shim ba ka jubab ka pynduh jingkyrmen, u Babu Boswell u la ong ba ym lah ban tip hapoh ka bor jongno la pynmih ïa ka jubab bad u la kynnoh ba ka pyni ïa ka jingbym shimkhia ïa ka jingeh jong ki nonghikai.
“Ka shithi ka thew ïa ka jingpyrshang ban thombor da ka Sorkar ban pyntreikam ïa ka skhim 2026 kaba ngi la kyntait katkum ki aiñ bad kiwei kiwei ki daw ba kyrshan da ki kot ki sla,” u la bynrap.
U Babu Boswell ula kynnoh ba ka sorkar ka dang shaniah ha u ophisar uba pyndonkam bakla ïa ki mat kiba ïadei bad ki nonghikai deficit.
U la kynthoh, “Une u dei uwei u briew uba ngi shem jingeh ban shaniah ha ki ktien bad ki hukum jong u. Phi tip ïa kaei kaba ka jingshah thok ka lah ban leh ïa u briew.”
U Babu Boswell ula ong ba katba ka sorkar ka shim ïa ka burom ban ailad ïa ki nonghikai ba la shongthait ban sei ïa ka pisa ba ki la lum na ka Central SBI account kaba mut ban pynmih ïa ka bai bam tymmen, kito ki nonghikai ki shah pynbor ban sei khlem sut namar ka jingeh ha ka liang ka pisa tyngka kaba la thaw da ka sorkar hi.
Halor ka Board of Trustees, u Babu Boswell u la ong ba ka jingdawa jong ki ban wanrah biang ïa la ka jong ka BOT ka la shah kyntait.
“Ngim kwah ban don bynta eiei bad ka board of trustees jong kiwei pat ki briew. Ka Scheme 2026 bad ka jingpynkylla beaiñ ïa ka BOT bad ka jingpynslem ban kheiñ ïa ka pisa jong ngi ha ka Central account kam dei kaei kaei hynrei ka dei ka kam thok,” u la kynnoh.
U la ong ba ka jubab ka khlem kren eiei halor ka jingpyndep ïa ka Centralized Provident Fund na ka bynta ki nongshah thungkam shwa u bnai Ïaïong 2010 bad ka skhim penshon ba la batai thymmai, bad ha ka New Defined Contribution Pension Scheme jong u bnai Nailar 2026, watla ka la iehnoh ïa ki katto katne ki hukum jong ka ïingbishar kiba don nongrim bha.
U Babu Boswell u la ong ba tang kawei kaba bha ka long ka jingpynthikna ba yn nym pynduh noh ïa ki kam deficit, hynrei da ki kot ki sla kiba ïadei bad ki bym pat weng noh, ka jingbym thikna ka dang sah na ka bynta ki nonghikai kiba dang shakri bad kiba kwah ban long nonghikai.
U la kynthoh ruh ïa ka jingkdew jong ka sorkar ïa ka jingduhnong jong ki khynnah skul lada ki nonghikai ki ïakhih da kaba khot ïa kane kum ka jingpyrshang ban ïalam bakla
“Ngim pan tang ban pynkiew ïa ka tulop jong ngi, hynrei ngi pan na ka sorkar ba kan ai ïa ngi ïa kaei kaba ngi dei ban ïoh, ban ym pynslem bad ban ym ïaid lait. Bad sngewbha Sorkar, wat thaw ïa ki jingïathuhkhana thok ban pynmong ïa ngi” ula bynrap.