Ka dei ruh ka sngi ban ainguh ïa u Blei na ka bynta shibun ki jingkyrkhu kiba u la theh sei ha ka Parish: Fr Augustine

Jowai, Risaw 11: Man la u snem ha ka taïew ba nyngkong jong u bnai Risaw (October) ki Paid riewngeit jong ka Parish Jowai ki shait pynlong ïa ka sngi burom jong ka Parish bad ha kane ka snem ki la pynlong mynta ka sngi (11/10/2026) ha kaba da ki spah ngut ki paidriewngeit kiba na ki shnong kiba hap hapoh ka Parish ki la ïawan shimbynta ha kane ka sngi burom jong ka Parish.
Ka kñia ka khriam ka long kaba donkam eh bad ha ka por shiphew baje kynrong sngi (10.00 AM) hapoh ka jingïalam jongu Rev. Phadar Augustine Lamin, Parish Priest jong ka Jowai Parish ha ryngkat ka jingsynran lang ki Lyngdohsohblei, la pynlong ïa ka jingknia Mass Iukharist bakhuid ha kaba ki paidriewngeit ki la ïashim bynta ha ka ïabam ka ïasip ïa U kpu U Rynsi uba long ka Met bad ka Snam jong U Jisu Khrist.
U Phadar Augustine Lamin haba kren ha kane ka sngi u ong ” Ko Hymmen ko Para ha U Trai Jisu Khrist, mynta ka sngi ngi ïalum lang hangne da ka dohnud kaba dap jingsngewnguh bad ka jingkmen ban rakhe ïa ka sngi burom Parish (Parish day) jong ngi ka sngi kaba kyrpang kaba pynkynmaw ïa ngi ba ngim dei tang ki briew shimet (individuals) kiba wan ban Mane ïa U Blei ha ka juh ka Ïingmane, hynrei ngi dei kum kawei ka ïing ka sem kiba ïatylli lang kawei ha ka jingngeit bad ha ka jingieid.Nangta u ong haba ngi pynlong ïa ka sngi burom Parish ym ka sngi burom na ka bynta ki Building jong ka Parish, hynrei ka dei ka sngi burom jong uwei pawei ki riewngeit kiba don hapoh ka jingpeit jingkhmih jong ka Parish Jowai.
Shuh shuh u Phadar Augustine u pynkynmaw ïa ki paidriewngeit haba pynlong ïa kum kane ka sngi burom jong ka Parish, ka dei ruh ka sngi ban ainguh ïa U Blei na ka bynta shibun ki jingkyrkhu kiba U la thehsei halor ka Parish bad ki riewngeit jongka bad da ka jingtrei shitom bad ka jinglenlade jong uwei pa kawei ki paidriewngeit bad ki dkhot jongkane ka Parish, kiba kynthup ïa ka Parish Pastoral Council, ki Rangbah Balang, ki Bei Balang, ki Chairman, ki Secretary jong ki CMC, ki Finance Secretary, ki Collectors,ki Samla, ki khynnah, ki Sisters, ki Catechist, ki Lyngdohsohblei bad ki Committee bapher bapher bad ki Balang shnong la lah ban pyntyllun bha ïa ki kam ki jam jong ka Parish kumba ka long mynta”.
U Phadar Augustine haba kren ha kane ka sngi u ong “ka Parish Jowai ka la pynkhreh ban rakhe ïa ka jingdap shispah snem (Centenary) jong ka Parish Jowai mynta u snem 2026 bad u kyntu ïa ki riewngeit jong ka Balang ban ïatrei lang kum kawei ka ïing ka sem ha ka ban pynlong ïa kane ka jingrakhe jingdap shispah snem jong ka Parish kan long kaba jop ha baroh ki liang”.
U Phadar Augustine u pynkut ïa ka jingkren jong u ha kane ka sngi burom jong ka Parish da kaba pynpaw ïa ka jingsngewnguh ka bakhraw ïa U Blei Trai Kynrad Uba la ïarap ïa ki jingdonkam ban tei ïa ka Ïingmane Bah kaba dangïaid ha ka jingtrei dep ïa ka lyngba ki Lok bad ki Nonglehbha kiba najan bad na jngai kiba la lehbha ha kano kano ka por kaba ka Parish ka donkam.
Ha kane ka sngi u Phadar Augustine Lamin u la pynkupbor ruh ki Nongtrei Balang jong ka Sor Jowai ba kin nangïaitrei shitom shuh shuh na ka bynta ka bha ka miat ka imlang ka sahlang, ka Balang bad ha kaba pynlong ïa kane ka jingrakhe shispahsnem (Centenary) jong ka Parish kan long kaba jop na ka bynta ka burom ka jong U Blei.