Nongpoh, Risaw 11: Hadien bun snem jong ka jingangnud jong ki paidbah nongshong shnong ka Kbet, Ri-Bhoi District, ban ïoh ïa ka surok hapoh shnong kaba biang, kane ka jingangnud ka la urlong hadien ba u MLA ka Nongpoh Constituency, Bah Mayralborn Syiem, u la plie paidbah ïa ka surok siang rong ba paka jong ka shnong Kbet, kaba la pyntrei lyngba ka skhim jong ka sorkar jylla ha ka jingmang pisa kaba T. 2 klur 63 lak.
Hadien ka jingplie paidbah, la pynlong ïa ka jingïalang ha madan football jong ka shnong Kbet, ha kaba la wan ïashim bynta da u MLA Bah Mayralborn Syiem, u D. S. Hylla, SDO ba dei peit ïa ka tnat PWD, u Bah E. Lyngdoh, SDO ka tnat PHE, u Bah R. Warjri, PWD, u BS. Syiem, Syiem ka Raid Nongbri, u Bah R. Mawphniang, Rangbah Shnong, ryngkat ki nongïalam shnong ba marjan bad kiwei ki riew rangbah ka thaiñ.
Haba ai jingkren, u MLA u la kyntu ïa ki nongshong shnong ban sumar bad pynneh pynsah ïa kane ka surok, da kaba pynpaw ba ka jingïatreilang jong ki paidbah ka long kaba kongsan ban pynthikna ba ka surok kan ïai long kaba bha bad shakri ïa ka shnong baroh kawei.
U la pyntip ruh ba ha u snem ban wan, hapoh ka bynta ba ar jong ka skhim jong ka tnat pule puthi, la thmu ban tei ïa ka building thymmai jong ka Government LP School ha Kbet, kaba long kawei pat ka sienjam ban kyntiew ïaka pule puthi ha katei ka shnong.
Lyngba kane ka sngi ka jingplie ïa kane ka surok ka long shisha ka jingkyrkhu ïaka shnong Kbet, namar ka lah ban pynsuk ïa ka leit ka wan jong ki paidbah bad kyntiew ïa ka jingïadei bad kiwei ki bynta ha katei ka thaiñ.
