Ranji Trophy: Khur 5 wiket u Ram Gurung na bynta ka Meghalaya ha ka sngi ba nyngkong pyrshah ïa ka Sikkim
Shillong, Risaw 11: Ka Meghalaya ka la pynkhyllem noh ïa ka Sikkim na ka bynta 245 ron ha ka sngi nyngkong jong ka jingïalehkai ba sdang jong ka plate group ha ka Ranji Trophy 2026-27 hynne ka sngi ha Rangpo, Sikkim, ha kaba u Ram Gurung u la khur 5/32.
Ka Meghalaya ka la jop ïa ka jingkynting pisa bad jied ban kawang bol nyngkong, kane ka rai ka la paw ba ka long kaba seisoh namar ka kynhun ka la lah ban pynduna 4 wiket tang na ka bynta 18 ron da ka jingtrei borbah jong u Ram bad arngut ki nongkawang bol ba dang samla u PM Santhosh bad u Abhishek Kumar.
U Santhosh u la ïoh ïa ka lad ban mih madan ha ka sien ba nyngkong ha ka kynhun ïalehkai ba rangbah hadien ba u la shah khot ha ka Meghalaya Cricket Association, kaba la jied ïa u katkum ka jinglah ban ïalehkai bha ha ki kyrdan ïalehkai Junior.
Uwei na ki saw ngut ki wiket ban shah pynhap udei u Gurinder Singh, u rangïalehkai kriket professional barim jong ka Meghalaya uba la ïalehkai mynta na ka Sikkim. U la shah weng noh na ka tied khlem da ïoh kamai ha u Santhosh.
Ki nongïalehkai ba pdeng jong ka Sikkim ki la lah ban shan kham slem ha ka tied bad kyntiew ïa ka jingkheiñ sha ka 245 ron ha ki 80.5 ober. Ka ron kaba heh tam jong ki ka long 45 da uwei pat u rangïalehkai professional ba nabar, u Satyajeet Bachhav.
U Satyajeet u la shah pynhap noh ha u Ram, uba la pyndep ban kawang 14.5 ober na ka bynta ki san tylli ki wiket. Kaba sngewtynnad ka long ba u la khur ïa u wiket uba san da kaba shu kem ïa ka bol ha kti hadien ba u nongtied u khlem shym la lah ban tied jngai.
U Santhosh u la ïoh ban khur 2/38 ha ka sien mih madan ba nyngkong, katba u Abhishek uba dang wanphai biang sha ka kynhun ïalehkai ba kham heh hadien lai snem u la khur 2/58. U Aryan Bora, nongkawang bol spin kti kadiang, u la ïoh ban khur ïa uwei pat u wiket, da kaba pynkut da ka jingkheiñ kaba 1/76 na ki 27 ober.
Ka Meghalaya ka la ïohlad ban tied tang 1 over hashuwa ban pynkut ïa ka sngi, ha kaba u Arpit Bhatewara bad u Kevin Christopher ki la lamkhmat ha ka tied. Baroh arngut ki la kamai mar kawei ka ron, ha kaba ka Meghalaya kan bteng na ka 2/0 mynta ka sngi.