Naphang yn khynra ki bor sorkar ban ïakhun pyrshah ïa u drok bad ki kam runar ba ïadei bad u – Bah Prestone

Shillong, Risaw 10 : Ka Sorkar Jylla ka la pynkhlaiñ ïa ki sienjam ban ïakhun pyrshah ïa ki kam runar kiba ïadei bad ki drok, da kaba pynkhlaiñ ïa ki kynhun kiba peit ïa ka jingpynpoi bad jingdie ïa u drok ha ka jylla.
Haba kren halor kane ka mat, Symbud Myntri Rangbah Bah Prestone Tynsong u la ong ba ka Sorkar ka la dep thaw ïa ka Mission Operation kaba la khlieh da u Heh Pulit barim ka jylla Bah Francis Kharshiing, bad la thaw ruh ïa ka kynhun kaba kynthup ïa ki tnat bapher bapher, kynthup ïa ka Social Welfare bad kiwei ki tnat kiba ïadei bad kane ka kam.
“Haba ngi kren shaphang u drok, don ar tylli ki mat kiba kongsan. Kawei ka long ban lap bad pynsangeh ïa ka jingpynpoi ïa u drok, bad kawei pat ka long ban ai jingïarap bad jaka sumar ne rehabilitation centre ïa kiba la ngop ha ka jingdih drok.”
U la ong ba ka jaka ai jingsumar ïa kiba kyrni dih drok kam dei ka kam kaba lah ban pyndep tang ha kawei ka sngi, hynrei kiba ngop ha ki drok ki donkam ban leit sha ki rehabilitation centre, ban ïoh ïa ka jingïasyllok bad kiwei ki jingïarap haduh ba kin da koit.
“Kane kam dei ka kam kaba lah ban pyndep tang shi sngi. Ngi hap ban phah ïa ki sha ki rehabilitation centre, ban ai counselling bad kiwei ki jingïarap, namar ka jingkoit na kane ka jingeh ka shim por.”
U Bah Prestone u la ong ruh ba na ka liang jong ka Pulit, la dep thaw ïa ka Anti-Narcotics Task Force (ANTF) kaba trei ban buddien ïa ka jingkhaii drok na ki bynta bapher bapher jong ka jylla.
“Ka ANTF ka trei ban pynthikna ba ka jingpynpoi ïa ki drok kaba wan na ki bynta bapher bapher jong ka Meghalaya dei ban khanglad bad pynsangeh shi syndon. Ym tang ban pynsangeh, hynrei ban kurup ruh ïa ki drok, bad kane ka kam kan dang bteng.”
U la pynpaw ruh ba ka Meghalaya kam lah ban ïakhun marwei pyrshah ïa ka jingwan jong ki drok, namar ki lah ban wan lyngba ki jylla marjan bad wat na shabar ka ri.
“Ngi donkam ruh ban ïatreilang bad ki jylla marjan bad ngi, namar ka Meghalaya marwei kam lah ban khang ïa ka jingpynpoi drok kaba wan na kawei ka jylla sha kawei pat, bad wat na shabar ka ri.”
Ha kajuh ka por, u la kyntu ïa ki paidbah ban ïatreilang bad ka Sorkar ban ïakhun pyrshah ïa ki drok bad kiwei ki kam runar.
“Ka jingïakhun pyrshah ïa ki drok kam dei tang ka kam jong ka Sorkar. Ki kmie ki kpa, ki khun, ka imlang sahlang bad ka Sorkar, baroh ngi donkam ban ïatreilang.”
U la kyntu ruh ïa ki paidbah ban long kiba husiar, khamtam haba ki hap ban leit shabar ha ki por mynmiet, bad ban pyntip sha ki bahaïing hasem shaphang ka jaka ba ki leit.
U Bah Prestone u la ong ba tang da ka jingïatreilang hapdeng ka Sorkar, ki Pulit bad ki paidbah, yn lah ban pynsangeh ïa ka jingpur jong ki drok bad ki kam runar ha ka jylla.
Haba jubab halor ka jingkylliang ïa u SP jong ka ANTF, u Bah Prestone u la ong ba ka jingpynkynriah kam ïa ki ophisar ka long katkum ki kyndon bad ka rukom treikam jong ka Sorkar, bad kam dei ka daw ban pynsuki ne pynsangeh ïa ki jingkhynra pyrshah ïa u drok.
“Ka jingpynkynriah ïa ki ophisar ka long katkum ka rukom treikam bad ka jingdonkam ha ka kam jong ki. Kam dei ba nga kwah ïa u A, B ne C. Don ka rukom treikam kaba dei ban bud, bad ka Sorkar ka hap ban bud ïa kata,” u la ong.
U la ong ruh ba ka Sorkar kan pynthikna ba ka jingpynkylla ïa ka jingkitkhlieh jong ki ophisar kan ym ktah ïa ka jingïakhun pyrshah ïa u drok.
“Ngin pynthikna ba ka jingpynkylla ïa ka jingkitkhlieh kan ym ktah ïa ki jingkhynra. Lada phi ong ba tang namar ba la pynkynriah kam ïa u SP, ki nongkhaii drok bad kiba ngop ha ki drok kin lait ban ïaid laitluid, te pyni ïa nga ba kane ka la jia,” u la ong.