Sepei ka jingpyrshang pynkhyllem sorkar, katba nang pyrshang katta nang khlaiñ ka NPP : Daniel Thangkhiew

Shillong, Risaw 10 : U Bah Daniel Thangkhiew uba dei u state treasurer jong ka NPP, u la ong ba ka jingpyrshang ban pynkhyllem ïa ka sorkar ba la ïalam da ka NPP, kan nym urlong, da kaba pynskhem ba ka party ka dang ïatylli bad nangroi.
Haba kren ha ka jingialap elekshon ha Mylliem kaba la pynlong da ka NPP Mylliem Block ha ka miet sngi Palei na ka bynta u kyrtong shiteng samoi jong ka Shillong Lok Sabha u Dr DRL Nonglait, u Bah Thangkhiew u la ong ba ki khubor lamler ki pynsaphriang ba ka sorkar kan khyllem.
“Ki don shibun ki bor kiba kwah ban pyntlot bad pynkhyllem ïa kane ka sorkar ba la ialam da ka NPP, hynrei lada peit ïa ki nongialam kiba stad kum u Myntri Rangbah ka Jylla, u bah Prestone Tynsong bad u bah Sniawbhalang Dhar ym don mano mano ruh ban pynkhyllem ïa ki”, u la ong.
U la ong ba ki khubor hamsaia ha ki kot khubor bad ha ki social media kiba kam ba ka NPP kan hiar ki long ki bym don nongrim.
“Ki Deputy Chief Minister jong ngi ki la ïakynduh ïa ki nongthoh khubor na ka por sha ka por bad ki la pynshai ba kam don eiei kum kata.Nga trei ha secretariat bad u Myntri Rangbah ka Jylla bad nga la ai ruh ïa ka jingkynthoh sha ki lad pathai khubor.Ha ki khyndiat sngi ba la dep baroh ki MLA ka NPP ki la ïakynduh lang ha ïing jong u Myntri Rangbah ka Jylla bad ym don mano mano ruh ba don jingthmu ban mih noh na ka party,” ong u Thangkhiew.
U la ong ba u Myntri Rangbah ka jylla u ju pynlong jingialang man u bnai bad ki MLA ban ïa kren ïa ki kam constituency bad ki briew kim dei ban shah ïalam bakla.
Shuh shuh u Bah Thangkhiew u la kam ba ka NPP ka dei tang ma ka ka party kaba kiew ha ka jylla.
“Dei tang ka NPP kaba nang kiew man la ka sngi, ka jingiasoh jong ki briew bad ki nongialam la ïohi tang ha ka NPP”, u la ong.
Haba kyrpad ïa ki nongthep vote jong ka Mylliem, u bah Thangkhiew u la kubur ba ka party ka la shah rem lai sien lynter ha katei ka block – ka elekshon MP bad ka kong Ampareen Lyngdoh, ka elekshon MDC bad ka elekshon MLA 2023 bad u bah Hamletson Dohling.
“Kane ka dei ka sien kaba saw ba ngi la wan shane.Nga ieng hangne da ka jingsngewrit ban kyntu ïa phi ba phin ai ba kane ka sien kaba saw kan long kaba rai bad ai ka jingkyrshan kaba pura ïa u Dr DRL Nonglait.Ka pyrthei baroh kawei ka tip kaei ka kam kaba u la leh, kaei ka jingtbit kaba u don bad kaei ka jingthmu babha kaba u don”, u la ong.
U la ong ba ka party ka la nang khlain ha Mylliem ha kaba u MLA barim ka Congress u bah Ronnie V Lyngdoh bad u kyrtong 2023 u bah Gill Laloo mynta ki don ha kajuh ka rynsan.
“Ka Mylliem ka long kawei.Da ka jingwan jong u Bah Ronnie ka jingdon u Bah Hamlet ka la nang khlain shuh shuh, ngi la ïaleh pyrshah iwei ïa iwei pat ha ki snem ba la dep, hynrei mynta ki briew jong u ki la pyniasoh ïalade bad ka NPP, ka party ka la nang khlain”, u la ong.
U bah Thangkhiew u la ai khublei ruh ïa ka sorkar bad myntri ka tnat PWD u bah Prestone Tynsong na ka bynta ki projek surok bad u la ong ba ki jingtyrwa na ka bynta ki skhim bapher bapher ha Mylliem ba la bud da u Bah Hamlet Dohling ki dang iaid shakhmat.