Mynshwa ki briew kim pat ju don ïa ki jingthoh, ki ju pynneh pynsah ïa ki khana lyngba ki maw: Dr Mohrmen

Jowai, Risaw 10 : Ka 3 tarik u October ka long ka sngi kaba kyrpang bad kaba sah jingkynmaw ha ka Kur Patlong, namar ha kane ka sngi la ïoh ban pynlait paidbah ïa ka kot History jong ka Kur, kaba kyrteng “A Brief History of the Patlong Clan”, kaba la thoh da Dr. Lambhadaka Patlong, ha ka ktien Khasi bad English.
Ïa kane ka kot la pynlait paidbah ha ïing jong ka Blostimon Patlong ha Khliehïongriang, Jowai, da Rev. Dr. H.H. Mohrmen, ha ka jingdonlang u Ma Eddystone Shylla, Waheh Chnong barim ka Tympang Iawmusiang uba long u Symbud Kongsan, u Ma Riquoma R.Q. Laloo, u Waheh Chnong barim ka Panaliar, u Ma Heibormi Sungoh, u Ma Pynbeit Laloo, Waheh Chnong ka Khliehiongriang, ki longkmie bad ki rangbah jong ka Kur Patlong, ryngkat bad ki paralok ba la shah khot sngewbha.
Ha ka jingkren jong u, Rev. Dr. H.H. Mohrmen u la ai ka jingïaroh ïa ka nongthoh namar ka jingshim ïa kane ka sienjam kaba khraw ban pynneh bad pynsah ïa ki khana bad jingtip kiba ïadei bad ka Kur, khnang ba ki pateng kiba wan kin ïoh tip ïa ka histori jong ka kur.U la ong ruh ba ka jingthoh bad ka jingtar ka long kaba kordor bha ha ka ban pynneh pynsah ïa ka riti bad ka dustur.
U la pynkynmaw ba ha ki por kiba mynshwa, ki briew kim pat ju don ïa ki jingthoh jingtar, hynrei ki ju pynneh pynsah ïa ki khana lyngba ki maw kiba long kum ki dak bad ki jingpynsahnam ïa ki jingjia bad ki khana kiba la ïaid pateng-la-pateng.
Ma Eddystone Shylla u la ong ba ka long ka jingsarong ïa ka Kur Patlong ban ïoh ïa kane ka nongkynti kaba long ka hok ban tyngkai ïa kaei kaba U Blei u la ai ha ngi, katkum ka sap bad ka talent jong manla uwei pa uwei.U la ban jur ruh ïa ka jingdonkam ban don ka jingïajan para kur.U la ong ba ka jingim ha imlang sahlang ka long kaba donkam bha.Hynrei, nyngkong eh, ngi dei ban tip kumno ban imlang sahlang bad ka ïing ka sem, nangta bad ka kur.
Ma Riquoma R.Q. Laloo, ha ka jingkren halor ka phang “Iei tre, ham ïa myllin”, u la ong ba baroh kiba im ha pyrthei, lada kim don ïa ka jingtip ïa ka tynrai jong ki, kim lah ban tip ïa ka jingim jong ki.Ka jaitbynriew kaba tip ïa la ka tynrai bad ka jingïoh pateng ka long ka jaitbynriew kaba im bad kaba skhem. U la ban jur ruh da kaba ong ba kam pher lada ngi ïapher ha ka ñiam, ka rukom leh ñiam, ka rukom im ne ka rukom ngeit. U la pynkynmaw ïa baroh ba lada ngi leit sha kano kano ka jaka, ngi dei ban kynmaw bad tip ïa ka jaka kaba ngi wan bad ngi dei ban tip ïa la ka tynrai.
U la ong ruh ba ka riam ka beit ka long kawei na ki bynta kiba pyni sha ka pyrthei ïa ka jinglong kyrpang jong ka jaitbynriew.Ha kajuh ka por, u la kyntu ïa baroh ban ïarap bad ai ka kti kamon bad kadiang bad ym dei ban ïatan ne ïapait para jong ngi. U la pynkut da kaba ong: “Haba tip ïa la ka tynrai bad ïa la ka tynrai pateng, ngi tip ïa ka jinglong rangbah jong ka ïing ka sem.”
Na ka liang jong ka nongthoh, ka la ai ïa ka jingkhublei kyrpang ïa Rev. Dr. H.H. Mohrmen bad Ma Riquoma R.Q. Laloo, kiba la long ki nongïalam, ki nongai jingmut bad ki nongpynshlur ïa ka ban thoh ïa kane ka kot.
Kane ka kot ka long kawei na ki sienjam ba kordor ban pynneh pynsah ïa ka histori, ka tynrai, ka riti bad ka dustur ym tang ïa ka Kur Patlong, hynrei la thoh ruh ïa ka history ba ïadei bad ki syiem, ki lum ki wah, ki pung ba donnam, ki mawbynna, ka jingriewspah ha ka rep ka riang bad kiwei kiwei de kiba kordor kiba don ha ka shnong, khnang ba ki pateng kiba wan kin ïoh ïa ka jingtip bad ban pynneh pynsah ïa ki.