Wat pynbiej ïa ki paidbah ong ka Genl.Secretary-VPP Sutnga Saipung Circle

Khliehriat Risaw 9 :- Ka General Secretary jong ka Voice of the People’s Party Sutnga Saipung Circle, kaba dei ruh ka MDC na Narpuh, ka kong Deiwi Tongper haba kren sha ki pathai khubor ka la pynpaw ka jingsngew bynñiaw ïa ka jingwan plie maw nongrim u myntri rangbah ka jylla u Conrad Sangma myn ha u bnai jymmang 2026 kaba dei na ka bynta ban shna ïa ka surok kaba naduh Dkhiah ter ter shaduh Sutnga-Saipung-Pala-Samasi, ha kaba u myntri rangbah u la kular ba hapoh ka 45 sngi yn sdang noh ïa ka kam ban pyntrei ïa ka surok, hynrei naduh u bnai jymmang haduh mynta ym pat shym la iohi dak eiei ruh ban pyntrei ïa kane ka surok, na kata ka daw ka kong Deiwi Tongper ka la ong bad kynthoh ba, “Balei plie maw nongrim haba khlem lah ban leh ïa ka kam, wat pynbiej ïa ki paidbah bapli”
La ong ba katkum ka jingkren u myntri rangbah ka jylla, ha ka por ba wan plie ïa u maw nongrim, u la pynbna ruh ïa ka mang tyngka kaba T 345 klur tyngka lyngba ka World Bank ban shna ïa ka surok.
Na ka liang ka kong Deiwi Tongper lem bad ki nongkitkam ka VPP na Jaiñtia mynta ka sngi ki la leit kynduh ïa u Executive Engineer jong ka tnat PWD Khliehriat bad la ong ba na ka liang ka tnat PWD ruh kam shym la lah ban ai jingpynshai eiei ruh halor kane ka kam kaba ïadei bad ka project shna surok kumba la pynbna da u myntri rangbah ka jylla myn ha u bnai jymmang 2026.
“ Na ka liang ka VPP Sutnga-Saipung Circle ngi la wan ha ophis PWD Khliehriat Division ban wad jingtip halor kato ka plie mawnongrim u myntri rangbah Conrad Sangma myn ha ka 28 tarik u bnai jymmang 2026 ba la ïa don lang u Symbud myntri rangbah, u bah Sniawbhalang Dhar lem bad ki MLA na East Jaintia, u bah Kyrmen Shylla bad kong Santa Mary Shylla ha kaba la pynbna ïa kata ka mang tyngka T345 klur ban shna surok, te ngi iohi ba u CM u la kren bad ong ba hapoh ka 45 sngi yn trei noh ïa ka project shna surok hynrei naduh utei u bnai jymmang haduh mynta u bnai risaw yn pat shym iohi dak eiei ban trei, te ka jingwan jong ngi hangne ha ophis PWD ka long ban wad jingtip bad jingpynshai namar ba ki paidbah ki la wan ud ha ngi namar ki nongshong shnong kiba na Samasi, Pala ki dang mad ïa kajuh ka surok kaba sniew haduh katta katta kaba la buh jingeh ha ka leit ka wan, te na ka liang ka ophis PWD ruh kam lah ban ai jingshai ïa ngi bad ki la ong ba ka dei beit na ka sorkar, te kumta ngi wad ïa ka jingshai ruh mynta na ka sorkar ba balei phi buh mawnongrim lada ym lah ban trei ia ka kam, watpynbiej ïa ki paidbah tang namar ba la jan ka elecction, ban shu pynbiej kumne peit ioh ka long pynbna kumba jia hapoh ka constituency jong i bah Prestone Tyngsong kata ka jingplie mawnongrim haduh ba i khyllung i khlad, te ngim kwah ba hapoh ka constituency Sutnga Saipung jong ngi kan wan jia kum kata”
Shuh shuh ka kong D.Tongper ka la ong ba ha ka por ba plie mawnongrim la plie saw spah tam klur ka project naduh Khaddum, Chympe bad sha Saipung hynrei haduh mynta kine baroh kim pat treikam eiei, ka kyntu jur ïa ka sorkar ba kam dei ban shu pynbiej paidbah tang na ka bynta ka jingmyntoi jong ki hynrei dei ban trei ryngkat bad ki kam bad ong ruh ba na ka liang ka VPP sutnga saipung Circle kan ïai buddien ïa kane.
Kumjuh ruh u President VPP Sutnga-Saipung Circle, u bah Prince Sukhlaiñ, u la ong bad bynrap ba kane ka surok na Dkhiah ter tersha Sutnga-Saipung, Pala Samasi khamtam ka bynta jong ka surok kaba naduh Lad Sakhaiñ haduh ba kut ka shnong Saipung, Samasi ka la sniew palat, kumta ka jingwan kynduh ïa u E.E ka PWD ka long ba ki kwah ban ioh ka jingpynshai, hynrei ka tnat kam lah ban pynshai “Ngi la iohi ba ka mangtyngka kaba la pynbna la ong haduh saw spah tam klur ka pisa hynrei ngi iohi ba don tangka jingmaramot ka bym biang bha kaba trei da ki briew khlem ki kor ki bor, kane ka la pynlyngngoh ïa ka VPP Sutnga-Saipung Circle ba kumno kata ka pisa kaba saw spah klur kaba la shu pyntrei pat tang da ki briew kaba ym don ki kor ki bor ne ki machine, u la ong ruh ba kane ka surok ka long kum u thied snam jong ki briew ba shong ba sah ha ki thain Nongkhlieh, Saipung “u myntri rangbah ka jylla u ong ba ngi leh ïa kaei kaba ngi pynbna (We do what wepreach), te sngewbha leh ïa kaei kaba phi la pynbna ha ka jingialang ba la pynlong ha Latyrke bad leh noh kloi katba lah” ong u bah P.Sukhlaiñ.