Nongstoiñ, Risaw 09: Ka HYC Mawshynrut Circle ha ka sngi thohdieng jong ka taiew ka la leit ban ïakynduh ïa u Executive Engineer jong ka tnad PWD Road, ban ïathuh ba ka jingtrei ïa ka surok ha Mawthengkut ka suki palat bad bun ki bynta kiba wat ïa ka jingtrei ruh ym pat sdang satia.
Ka seng lyngba u President u Samla Losbingnel Lyngkhoi bad u General Secretary u Samla Ardonal Marbaniang, ki ïathuh ruh hakhmat u Engineer ba ki lah leit ban jurip hi ïa katei ka surok, kaba don mynta ha ka Project KJP Synod Sepngi ka ban sah long ha ka 11 tarik haduh 14 tarik Lber 2027 ha ka Balang Mawthengkut.
Na ka liang ka seng ka kyntu ïa u Executive Engineer ba un kyntu bad bthah ruh sha baroh ki contractor kiba trei ïa ki jingtrei surok, jingkieng bad kiwei pat ki jingtrei ba kin trei kham sted namar dang sah satang saw bnai tam ba kin pyndep ïa ki jingtrei.
Na ka liang u Exceutive Engineer u la ïathuh ba lah mang pisa haduh 35 klur duna na bynta ka KJP Synod Sepngi ha Mawthengkut. U la ïathuh ruh ba ka preliminary work order ruh lah dep ban ai sha ki contractor.
Hynrei, ka jingpynslem jong ki contractor ban pyntrei, ka dei namar ba ki contractor ki khlem pat ïoh ïa ka final work order. Katba ka jingpynslem ban ai ïa ka final work order ka dei namar ba bun na ki contractor ki pynslem ban thep ïa ka call deposit.
