Pyllait paidbah u MLA Khliehriat ïa ka kot ‘The Other Side of Our Life’ ba thoh u Dr. Becare me o Siangshai

Khliehriat Risaw 8: U MLA jong ka Khliehriat, u bah Kyrmen Shylla hynnin ka sngi haka jingialang ba la pynlong ha Lad Sutnga, u la pyllait paidbah ïa ka kot kaba la ai kyrteng ‘The Other Side of Our Lives: A Short Reflection on Life.’ ba la thoh da u Dr Becare Me O Nongtdu u ba shong ba sah ha Dkhiah East (Lad Sutnga), ha kane ka sngi la ïa don lang ruh u MDC, bah Wailad Dameshwa kum u symbud kongsan, U bah Krison Langstang, MDC, ka long Violet Lyngdoh, MDC, u MLA barim ka Khliehriat, u bah Justine Dkhar, u Director jong ka Jaintia Eastern College Khliehriat, u Dr P.Nongtdu, Waheh Shnong Dkhiah East, u bah Predalin Nongtdu, Father Lessmon Nongtdu, Brother Solomon Swer bad kiwei kiwei ki riew rangbah.
Haba kren kum u kongsan u bah Kyrmen Shylla, u la ai ka jingkhublei kitbok kitrwiang ïa u Dr Becare Me O Nongtdu uba la noh syniang ha kam thoh kot bad ong ruh ba kane ka kot kaba u la thoh ka dei kaba don jingmut bha namar ki jingthoh ha kane ka kot ki phalang ïa ka jingim bad jingiaid lynti jong u nongthoh uba la ïaid lynti bun ki jingeh bad jingialeh ha ka jingim, ha kajuh ka por u kongsan u kyntu bad ai mynsiem ïa u nongthoh ba un nang ïaid shaphnrang ha ka kam thoh kot bad ong ruh ba kane ka long ka nuksa ïa kiwei ruh khamtam ki khun samla kiba don ka sap ha ka thoh ka tar ban shim ïa ka synjam ban nohsyniang ha ka thoh ka tar.
Na ka liang u Dr Dr. Becare me o Nongtdu, uba la pynshai bad pynsngew ïa kiei kiei kiba la pynlong kiba la ai mynsiem shi katdei eh ïa u ban thoh ïa kane ka kot bad ong ba ha kaba sdang u la don jingmut ban pynlong ïa kane ka kot kum ka Autobiography ‘The Other Side of My Life’ hynrei haba puson bad ngam jylliew u la pynkylla noh sha kawei pat ka bynta bad pynkylla noh ‘The Other Side of Our Lives’ khnnag ba kan long kum ka jingkhang bah lane ka Door way ïa kiwei ruh ban rung sha ka jingim ka jingialeh.
La ong ruh ba ki jingthoh ha kane ka kot ki phalang bad pashat jingmut shibun kiei kiei “Naduh ka por ba nga dang bat kum u President North East Catholic Youth nga la don jingmut ban thoh ïa kane ka kot bad nga la ioh ruh ïa ka lad ban leit mihkhmat na ka ri India ha kawei ka jingialang ha nongbah Rome bad hangne nga la ioh ruh ïa ka lad ban iakynduh bad u kpa bakhuid, u (L) Pope Francis bad hadien kane ka jingiakynduh bad u Pope ka pynpoi pyrkhat ïa nga nga dei tang u briew lane uta u Ordinary Man ha kaba u Blei u la jied ïa nga, da kaba ngam jylliew nga shem shuh shuh ba naduh ka ktien ka thylliej, naduh ka jinglong khynnah haduh ka jinglong ynda la san la rangbah ngi don ka bynta bad don ruh ki dienjat kibapher bapher bad nga tip don ruh ki dak mong ne ki scars, hynrei ka dei beit pat ban ïaid shakhmat bad shim ïa ka bynta ban long ki nongshongshnong kiba don ka jingkitkhlieh bad pynkylla noh ïa kita ki jingmong sha ki khlur”
U Dr. Becare Me O Nongtdu, u la ong ruh ba ka jingthmu jong kane ka kot ba u thoh ka long ruh ban pynbha ïa ka imlang ka sahlang bad lyngba kane ka kot u kyntu ba dei ban pyrshang ruh ban kylli ialade hato ngi dei kiei? Bad ka jubab kabapher bapher kan mih bad lada ngam jylliew ïa ka jingthoh khlem pep kan long ka jingmyntoi kaba khraw “Kynmaw ba lada ngi dei kita ki briew kiba shisha ngi dei ban sngewthuh ba ngi don tang kawei ka lynti ban ïaid ha kane ka sla pyrthei bad kata ka lynti ka dei ka jingshisha” ong u nongthoh.
Shuh shuh u kyntu bad ai mynsiem ba dei ban klet bad ieh noh shadien ïa ki jingmong, jingsngewsih baroh bad ïaid shakhmat ban poi sha ka thong ka jingim.“Ha ka prokram, la ioh ruh ia ka jingkren na u symbud kongsan, u MDC bah Wailaddameshwa Siangshai.