Nongstoiñ, Risaw 08: Ki nongïalam jong ka seng HNYM West Khasi Hills District ha ka sngi palei jong ka taiew, ki la leit ban wad ïa ki bor pynïaid District halor ka kynrum kynram kaba la jia ha kine ki khyndiat bnai, kat haduh ban poi u pud ban pynduh khaw rashon ïa ki paidbah.
Na ka liang u Bah Tailan Lyngkhoi President jong ka seng HNYM West Khasi Hills, u la ong ba la lai bnai mynta ki paidbah na kylleng ka District ki la ud la nam halor ka jingbym ïoh shuh ïa u khaw rashon jong ka sorkar kaba ki dei ban ïoh beit kumba ju long.
U la ong ba ka seng ha ka jingwad jingtip na ki bor pynïaid ïa ka kam, la ïathuh ba ka daw ka dei namar ka shnong Pyndengrei kam shah shuh ban kit ïa u khaw sha ka FCI godown kaba don ha katei ka shnong, namar ki daw kiba ka shnong ka ïa tyngkhuh.
Hynrei, na ka liang ka seng ka la rai pat ban ai por 30 sngi kynthih naduh mynta ka sngi ïa ki bor synshar District, ba kin shimkhia bad leh ei ei kham kloi ïa kane ka kam. Lada ki paidbah nongshong shnong ka District ki dang duh ïa u khaw rashon, ka seng kam banse ban wer paidbah ban ïakhih pyrshah tad haduh ba kin ïoh biang ïa ka hok jong ki.
“Ngi la ïoh ïa ka jingud jingnam jong ki paidbah ba bun jong ka dong ka thaiñ West Khasi Hills halor ka jingduh noh ïa u khaw rashon mynta la jan lai bnai. Ka jingbym ïoh shuh ïa u khaw rashon ha ka jinglap jong ngi lyngba ka jingïakren bad ka ophis ba dei peit, ka long na ka daw ka jingbym shah shuh ka shnong Pyndengrei ban wan pynhap khaw ha ka godown kaba don hapoh jong ka shnong da ki trok ba don 10 lane 12 taïar shaneng “.
“Ka long kaba pynlyngngoh ïa baroh ki paidbah ba lada kim shah shuh mynta balei naduh ki por mynshwa pat ki shah. Lah da ki snem ki kali kit khaw rashon ki ïaid beit ha katei ka shnong Pyndengrei, hynrei mynta kyndit pat ki bor pynïaid ophis jong ka tnad supply, ki la pynshai ba kim shah shuh na ka liang ka shnong”.
“Lehse kawei pat ka daw kumba ngi la ïohi lyngba ki lad pathai khubor ha kine ki bnai ba la dep halor ka jingshah shim pisa 2500 kawei ka trok. Ngi la ïohi ruh lyngba ki lad pathai khubor ba lyngba ka jingïalam jong u Bah Mosklander Marngar President jong ka seng ki nongñiah trok, ha kaba ki la leit ban ïakren hangtei ha FCI namar ka jingshim pisa 2500 kawei ka trok khlem kino kino ki receipt. Lehse kane ruh ka lah ban dei kawei na ki daw ban pynsangeh noh ïa kine ki trok ban leit buh ïa u khaw rashon”.
“Hynrei ban ïalehkai ïa kaei kaei kaba dei hok ka bhah jong ki paidbah, ka long ka bym dei ne ka bym lah satia ban pdiang. Kum ki paidbah ngim lah ban pdiang ïa kaba kum kane. Nang ïalehkai phi kiba heh ba haiñ hynrei nang ïap pat ki paidbah ka long ka bym long”.
“Ngi kyrpad jur ïa ki bor pynïaid jong ka West Khasi Hills District, ba kin sngewbha ban shimkhia bad leh kham kloi ïa kane ka kam ban pynïoh biang ïa u khaw rashon sha ki paidbah. Ka sien jam nangne shakhmat ka long ba lada ki bor pynïaid District kim lah ban pynbeit hapoh ka 30 sngi naduh mynta ka sngi 8 tarik Risaw 2026, na ka liang jong ngi, ngim banse ban lum da ka jingïalang paidbah ban dawa ïa la ka hok”, ong u Bah Tailan Lyngkhoi.
