Shillong, Risaw 06 : Ki nongïalehkai niah cycle na Meghalaya ki la wanrah ïa ka burom kaba khraw ïa ka jylla da kaba khur san tylli ki takma ha ka Senior Cross Country jong ka 23rd National MTB Championship 2026, kaba la pynlong ha Odisha naduh ka 01 tarik haduh ka 04 tarik u Risaw 2026.
Ïa kane ka jingïakob la pynïaid da ka Odisha Cycling Association hapoh ka jingpeit bad jingpynïaid jong ka Cycling Federation of India. Kane ka dei ka sien kaba nyngkong ba ki nongïalehkai na Meghalaya ki la lah ban khur takma ha ka Senior Cross Country jong ka National MTB Championship.
Ha kane ka lympung, Meghalaya ka la leit mihkhmat da 13 ngut ki samla, na kiba lai ngut ki la lah ban khur ïa ki takma ksiar bad takma rnong.
Napdeng ki nongïalehkai kiba la khur takma, u Sharailang Basaïawmoit u la khur kawei ka takma ksiar ha ka Senior Under-23 Category jong ka Cross Country Eliminator, bad kawei ka takma rnong ha ka Cross Country Mass Start.
U Kevin Lyngdoh Sangriang u la pyni ïa ka jingtbit ha kane ka jingïakob da kaba khur ar tylli ki takma ksiar ha ka Sub-Junior Category, kata ha ka Cross Country Time Trial bad ka Cross Country Mass Start.
Uwei pat u nongïalehkai, u Taitus Ch. Sangma, u la khur kawei ka takma rnong ha ka Senior Downhill.
Ka jingjop jong kine ki nongïalehkai ka long ka jingkmen bad ka burom kaba khraw ym tang ïa ki hi hynrei ruh ïa ka jylla Meghalaya, namar ka pyni ïa ka jinglah bad ka sap jong ki samla ka jylla ha ka jingïalehkai niah cycle.
Haba kren sha ki lad pathai khubor, na ka liang u President jong ka Meghalaya Cycling Association, u Bah Barnis Tiewla, u la ong ba kane ka long ka khubor kaba pynsngew sarong ïa ka jylla Meghalaya baroh kawei.
U la ai khublei ruh ïa ka Sorkar Jylla Meghalaya halor ka jingïarap pisa na ka bynta ban thied ïa ki tiar ki tar bad kiwei ki jingdonkam kiba ïadei bad ka jingïalehkai, kynthup ïa ka bai bam bad kiwei pat ki jingdonkam jong ki nongïalehkai.
U la ong ba ka jingïarap jong ka Sorkar ka long kaba donkam bha ban ai mynsiem bad ban kyntiew shuh shuh ïa ki nongïalehkai ka jylla, khamtam ha ka jingïakhun ha ki lympung kiba heh ha ka ri.
