Lada ka jingtohkit ka lap shisha ba donkti ki heh ki haiñ ban khrong pisa beaiñ, hap ai jingïaroh ïa ka KSU

Lada ka paw shisha kumba la ïohi ha ki video ba la pyni shai da ki dkhot ka KSU bad ka jingtohkit kan lap ba donkti kiba heh ba haiñ ne ki riew sorkar bad ki riew saiñ pyrthei, hap ai burom ïa ka Khasi Students Union (KSU) kaba la ïoh ban kem ïa ki pulit lute trok, ha ka por, ba ki dang tare pisa na ki nongñiah trok ha ki bynta jong ka thaiñ Dieng pasoh bad katei ka jingïoh kem jong ka KSU ïa kitei ki pulit lute trok, ka pyni ba ki don pleng ki katto katne ki samla khlem kam, kiba wad kam pulit tang ban ïoh lute bad ngim tip, la ka don ne em ka jingshah hikai kyrpang jong ki, ha kaba ïadei bad katei ka kam tare pisa na ki nongleit nongwan khlem daw.
Kane ka khubor ka la saphriang sted bha khamtam ki video, hadien ka jingkhynra jong ka KSU, u heh pulit jong ka East Khasi hills, u ïathuh ba la weng kam ïa ki 4 ngut ki pulit kiba don kti ha katei ka kam bad la kynriah kam ïa u ophisar in charge jong ka Diengpasoh. Hynrei ka jingkylli kaba wan hangne, ka long ba lada don u nongkloh pla ha ïew ha hat, ha lynti syngkien bad don ba ïoh bat, kumta ki ju aiti sha ki pulit bad kitei ki ju shah sympat bad shah set ha lock up, lada jia ba kim poi sha phatok ruh; hangne pat kaba lyngngoh ka long ba kumno sha u heh duh jong ka thanat ha Diengpasoh, u lait na ka jingshah weng kam, hynrei ki ngat da kito ki langrut bapli, kiba shu dei tang ki nonglum khutia, katba u nonglum ïa ka song heh u lait phet noh.
Kane ka paw shai ba lada pyn shitom tang ïa kito ki pulit kiba don ha i sem rit, kumta ka jingtohkit kan kut beit tang ha itei i sem lane ba kitei ki dei kiba ïasylla hi para ma ki ban leh ïa katei ka kam dawa pisa na ki kali kiba ïaid ba ïeng; katba lada poi shaduh sha thanat, hangta ka phlim kan kham jrong.
Ba kan shai katei ka kam, ka dei ban don ka jingtohkit, namar ba lada ka jingïoh lum kan long antad tang 10 hajar shisngi, kumta ha ka shibnai kan poi antad sha ka T.3 lak bad lada kitei ki pulit kiba don ha itei i sem, ki ïabam hi ïalade, ïa katei ka lai lak, kumta ki la dei ban ïa deng ïalade da ka baje ksiar, da ki sati ksiar bad ban ïa ïaid ïa ïeng da ki Fortuner.
Ka KSU ha ka kyrwoh jong ka, ka buh jingkylli ruh ba ki minister jong kane ka sorkar jylla, ki ïoh ne em ban jliah lem ïa katei ka mluh, kaba shu tare da ka bor na kti jong ki draibar trok bad lada ka long lei kumta ka pyni, ba ka mat ka nang jrong bad ka nang jngai bad ka donkam ka jingtohkit kaba kham bniah bad kham jylliew ban tip, ïa kiba donkti ha katei ka kam bad ka network jong ki, ïoh kam dei tang shi jaka, hynrei ïoh ka la pur shawei ruh sha kiwei ruh kiba shalor duh kiba don ha ka sorkar.
Kane ka khubor ka la pynshaïong bad pynkyndit ïa kiba bun Balang ki paidbah nongshong shnong ka jylla khamtam ba mynta ka kynti ka dang ïaid artad ki jingialap elekshon shiteng samoi sha ka Lok Sabha na Shillong Parliamentary Seat ne constituency.
Kane ka mat ka lah ban pynkylla ruh wat ïa ka jingpynmih ïa elekshon shiteng samoi MP ha Shillong Constituency bad lada ka pyni ïa ka jylla ka result ka pyni ba ki nongshong shnong ka Shillong bad jong ka Jylla Meghalaya baroh kawei ki la ïathuh ba ym lah shuh ban pynbeij ïa ki, ïoh ba ki la kwah ïa ka jingkylla ha ka jylla, khamtam eh ba mynta ka la mih sa ka jingkylla ha ka saiñ pyrthei ha jylla hadien ka jingleit pynïasoh ki phra ngut ki MLA ka United Democratic party bad uwei u MDC na Jaiñtia Hills District.
Lah ruh ban ong ba kane ka jingmih paidbah jong ka KSU ban pyni ïa ki kam khrong bad lum pisa beaiñ kam shym la kut satia wat ba ka la don ka jingtohkit hynrei ka la nang dawa ba dei ban pynsngeh kam ïa u SP bad kiwei kiba la kynnoh donkti bad dawa ruh da ka jingtohkit kaba laitluid bad la ïohi ba ha ka sngi saitjaiñ kane ka seng ki samla pule ka la leit syndon ban wah da ki banner bad ki poster ha ki thaiñ Secretariat bad kiwei ki jaka kum ka dak ka jingdawa jong ka ban pynïoh ïa ka jingtohkit kaba laitluid.