Namar ba shah teh shah khum ki kti, kwah ban pynduh noh ïa ka paragraph 12 A: Bah Moonlight

Shillong, Risaw 3: U Bah Moonlight Pariat uba la long MDC haduh hynriew sien kynthih bad uba la long teng ruh u Chief Executive Menber (CEM) ka JHADC, mynta ka sngi ka 3 tarik u bnai Risaw u la pynïasoh sha ka Bharatiya Janata Party (BJP).
Ha kane ka sngi ba u Bah Pariat u pyniasoh bad ka BJP la sakhi lang ruh da u State President ka BJP u Rikkan G Momin, ha ryngkat bad u Myntri Sorkar u Bah Sanbor Shullai, u Bah AL Hek nalor ki MLA barim jong ka party.
Ïa u Bah Pariat la synran lang da ka kurim jong u bad ki khun, u Bah Moonlight Pariat u la jop nyngkongeh ïa ka election MDC kadei ha u snem 1994, u snem 1999, 2004, 2009, 2014 bad ha u snem 2025 bad ha kine ki 27 ngut kum u MDC u la long teng ruh kum u CEM ka JHADC.
Ha shwa ban pyniasoh bad ka BJP u Bah Moonlight Pariat u la long u MDC shimet bad uba bat ruh kum u Executive Member hapoh ka jingialam u Bah Thombor Shiwat kum u CEM.
Ïa u Bah Pariat la pdiang sngewbha da u State President ka BJP u Rikkan G Momin ha ryngkat lang bad u Bah Sanbor Shullai bad u Bah AL Hek ha ka jingsakhi lang ki MLA barim ka party kum u Dr Jemino Mawthoh bad u Bah Mohendro Rapsang.
Haba kren u Rikkam G Momin u la ai khublei ïa u Bah Moonlight Pariat uba la jied ban rung sha ka party BJP bad ban bteng ia ka jingiaid lynti kum u MDC ka BJP hapoh ka ïing dorbar jong ka JHADC.
“Ka jingrung u Bah Pariat sha ka BJP ka long ka por kaba donkam bha na ka bynta jong ngi bad ngi khmih lynti ban ngin ïa trei lang ryngkat ryngkat, ka jingshemphang ha ka sain pyrthei u long uba la ih bha bad uba don ka jingiadei kaba jan bha bad ki paidbah” ong u Momin.
Shuh shuh u la ong, “Ngi ngeit haba ki briew kiba bha ki don lang ha kajuh lyngba ka jingiohi jngai kan dang pynkhlain shuh shuh ïa ka party”.
Haba kren hadien ba la shah pdiang sngewbha u Bah Moonlight Pariat u la ong, ka nongrim jong ka BJP bad ka nongrim kaba u ieng ka long kumjuh namar ngi thmu ban ai ka jingshakri ïa ki paidbah bad ka jingdon jong ngi hangne ym dei ban gin shakri ïa lade bad dei na kane ka daw ba ki paidbah kisa jied ïa nga hynriew sien kynthihkum u MDC.
Kane ka dei 27 snem ba nga la don ha District Council bad nga la pyrshah ban leh shibun ki kam na ka bynta ki paidbah jong ka ri lum Jaintia, hynrei ngan ong ha phi ba ki kti jong ki la shah teh shah khum, u la ong.
“Balei nga ong ïa kane namar ba ka paragraph 12 a jong ka khyrnit ba hynriew bad ka riti synshar ka ri India kala teh la khum ïa ki kti jong ngi ki MDC ha baroh lai tylli ki ADC hapoh Meghalaya bad ngim long laitluid wat lada ngi don shibun kiei kiei ban leh naka bynta ki paidbah bad dei namar ka paragraph 12 a ngim lah ban leh eiei” ong u Bah Pariat.
Shuh shuh u la ong, “Balei nga pyniasoh bad ka BJP, bad mynta nga lah don hapoh ka party kaba synshar ruh ha Delhi bad dei hangne nga ioh ïa ka kabu ban pynsngew sha ki heh ka party ïa baroh ki jingeh bad nga kyrmen kane ka khubor kan poi sha shkor ki nongialam ka party ha Delhi, khnang ba kin sngewthuh ïa ki jingeh ba ki ADC ki ia kynduh”.
“Ngin ïa khun lang ryngkat bad ngin ïaleh ban pynduh noh ia ka paragraph 12 a namar ba kane ka paragraph ka ong lada ki ain jong ka District Council kan ia tyngkhuh bad jong ka sorkar jylla, ka aiñ jong ka sorkar jylla kan ïeng dei halor kane ba ïa ki kti jong ngi la shah teh shah khum” ong u Bah Pariat.
Ryngkat bad phi ki nongialam ngin iakhun bad kane ka para 12 a dei ban pynduh noh ne weng noh ïa ka, u la ong.