Rakhe ka PHE Mawkyrwat ïa ka Jal Arpan Diwas, aiti ïa ki Projek pynpoi um sha phra (8) tylli ki VWSC

Mawkyrwat, Risaw 02: Kum shi bynta jong ka Jal Jeevan Mission (JJM), ka Public Health Engineering (PHE) Mawkyrwat Division, South West Khasi Hills District, mynta ka sngi, ka 2 tarik Risaw, 2026, ka la rakhe ïa ka ‘Jal Arpan Diwas’ ha ka shnong Wahkaji hapoh ka Ranikor C&RD Block, South West Khasi Hills District.
Ha kane ka jingïalang la wan sakhi bad pynphuh pynphieng da u bah Pius Marweiñ, MLA/MDC jong ka Ranikor Constituency, kum u Kongsan, ha ka jingïadonlang u bah S. Marweiñ, MCS, BDO, Ranikor C&RD Block, kum u Guest of Honour, bad u bah K. Nongbsaw, Executive Engineer jong ka PHE Mawkyrwat Division.
Haba kren ha ka jingïalang, u Bah Pius Marweiñ ula ai jingïaroh ïa ka tnat PHE jong ka Mawkyrwat Division kaba la shimkhia bad treishitom ban pynpoi ïa ka umbam umdih ha man la ki shnong bad khamtam eh ha manla ki thliew ïing lyngba ka JJM. Kumta ula buh ïa ka jingkyntu ïa ki paidbah nongshong shnong ba ki dei ban ai ka jingïatreilang bad ka ophis ha ki liang baroh bad ba kin sngewtrai ruh ïa ka um, kumjuh ruh ba kin sumar ïa ki khlaw ki btap bad khamtam eh ïa ki tyllong umbam umdih.
U bah K. Nongbsaw, Executive Engineer PHE Mawkyrwat Division ha ka jingkren jong u, u la ïoh ruh ban pynshai ha kaba ïa dei bad ki kamram bad ki jingkitkhlieh jong ka Village Water & Sanitation Committee (VWSC) bad kumjuh ruh ïa ka 16 Finance Commission Tied Grant ka skhim ban ai jingïarap kyrpang ïa ki shnong bad ki VWSCs kaba dei kumno ban nang pynbha shuh shuh ïa ka JJM hapoh ki shnong ki thaw.
Kum shi bynta jong ka jingrakhe, ka PHE Mawkyrwat Division ka la aiti paidbah ïa ki Project Pynpoi Um bapher bapher hapoh ka Jal Jeevan Mission sha phra (8) tylli ki Village Water and Sanitation Committees (VWSCs) kiba hap hapoh ki Mawkyrwat bad Ranikor C&RD Blocks. Kane ka jingaiti ka long ka sienjam kaba kongsan ban pynthikna ïa ka jingïoh um dih kaba shngaiñ, ba khuid bad ba lah ban poi ha ki longïing ha ki shnong nongkyndong.
Ïa ka jingïalang la pynïaid da u bah E. Khongtiang, Sub-Divisional Officer (TC), PHE Mawkyrwat Division, ka jingkren pdiang na u Secretary jong ka VWSC, Wahkaji Village, bud sa da ka Action Song da ki khynnah pule jong ka Wahkaji Government Upper Primary School.
Ha kane ka jingïalang la ai ruh ïa ki jingkren da u bah Phailand Lyngdoh, Rangbah Shnong Wahkaji, bad u bah S. Jyrwa, Rangbah Shnong Pyndendiwah. Ïa ka jingsmai ne pledge la pynïaid da u bah Eson Khongrymmai, DPM, NRLM Mawkyrwat.
Kiwei pat ki bynta kiba pynphuh ïa ka jingïalang ki kynthup ïa ka jingrwai da ka Mawkhlaitngap VWSC, ryngkat bad ka Field Test Kit (FTK) Demonstration ban pyni ïa ka rukom test bad peit bniah ïa ka jingkhuid bad ka jingbit jong ka um.
Ka jingïalang ka la poi sha kaba kut da ka jingai khublei na u bah I. Kharbudon, Sub-Divisional Officer, PHE Mawkyrwat Sub-Division, hadien kata la pynlong ïa ka jingïaid paidbah bad rally ban pynsah jingkynmaw ïa kane ka sngi kyrpang jong ka um ha kaba la ïashimbynta naduh ki khynnah skul, ki nonghikai, ki ophisar, lem bad u MLA/MDC ka Ranikor Constituency.