Ïapatrong ki pulit bad u MDC Nongstoiñ ha phyllaw jong ka DC Ophis

Nongstoiñ, Nailur 30: Hadien shi sngi ba ki dkhot jong ka Voice of the Peoples Party State Youth Wing, ha ka jingïalam jong u MDC Nongstoiñ ki la rung ban pynsangeh ïa ka Personal Interview kam Staff Nurse ha DC Ophis, hynne ka sngi ki la leit biang sha DC ophis ha ryngkat ki jingthoh bad sakhi satar halor ka jingkynnoh ba la paw ka kam bam sap bad kim don jingshaniah shuh ïa ka jingkhot pynlong thungkam hapoh MCH Hospital Nongstoiñ.
Naduh ka por 9 baje mynstep u MDC u Dr Juristman Ïawphniaw ryngkat ki dkhot ka State Youth Wing ki la leit ban ap ha khyrdop DC ophis, ryngkat ka jingkyrmen ban ïoh rung bad ïakren bad ka Deputy Commissioner halor kane ka kam ha ryngkat ruh bad ka jingthoh.
Pynban watla ki la ap haduh ar kynta shiteng, ym shym la don briew ba wan ban khot ïakren bad la pynap pynban da ki pulit pahara ha khyrdop bad la khang ruh ïa ka khyrdop ban ym shah ïano ïano ruh ban rung shapoh phyllaw jong ka ophis.
Shuh shuh, na ka liang u MDC bad ki nongkyrshan haba kim ïoh ban rung shapoh, ki la ïakren bad kyntu ïa ki nongap pahara hakhmat ka khyrdop lem bad ïa ki majistor, ba kin ïathuh lem sha ka DC ba ki kwah ïakynduh bad ïakren bad ka DC shwa ban sdang ka Interview. Hynrei ym shym la shah satia bad shu phah ap haduh 2 kynta shabar ka khyrdop.
Hadien ar kynta tam, ki dkhot ka State Youth Wing jong ka VPP ki la sdang ban tur da kaba pyrshang wat ban rat ïa ka khyrdop ruh. Hangne ka la mih ka jingïapyni bor hapdeng jong ki bad ki pulit bad ka la don ruh ka jingïakurup para briew, ha kaba na ka liang ki pulit ki ïaleh ban ym shah ban rung shapoh, katba na ka liang u MDC bad ki nongkyrshan ka VPP ki ïakhun katba lah ban rung shapoh.
Na ka liang u MDC ha kane ka jingtur sha DC ophis u la wanrah ruh ïa ki kot ki sla, kiba u la kam ba ki dei ki sakhi kiba pynpaw ïa ka jingïathoh message mar kylliang ryngkat ka transaction kaba pyni ba ka la don ka jingïathong pisa, ha kaba ïadei bad ka jingpynrung kam ha ki post staff nurse ha MCH Hospital Nongstoiñ. U la ong ruh ba u kwah ban pyni ïa kine ki sakhi kumba la pan jingpynshisha.
Kumta hapdeng ka jingïakhun ha khyrdop, ki la ïoh ban rung shapoh phyllaw bad ka la don ka jingïapyni bor kaba shiphang bad ki pulit. Hynrei la lah ban tem noh pat hapoh phyllaw jong ka DC ophis, hadien katto katne por jong ka jingïapyni nia bad ki majistor. Kata ka long hadien ba ka DC ka la ai da ka jingthoh sha ki dkhot jong ka VPP State Youth Wing ryngkat u MDC Nongstoiñ, ba la dep rai ban thung ïa ka komiti ban tohkit halor kane ka jingjia.
Ha ka shithi ba ki nongkitkam ki la ïoh pdiang, la ong ba kane ka kynhun tohkit yn ïalam hi da u Superintendent of Police Bah H.Kharkongkor ha ryngkat u Bah E.Lyngdoh MCS, AC Executive Magsitrate West Khasi Hills. La ong ruh ha ka shithi ba yn ym pynmih risol ei ei ruh halor kane ka interview thung kam, kaba ym pat lah satia ban pyndep ïa ka jingtohkit.
“Ngi wan da ka lynti jong ka jingsuk bad kwah ban ïa pynbeit ïa kane ka kam jong ki paidbah. Jyn lada I DC I khot noh mar mar ïa ngi ban ïakren tang shiphang halor kane ka kam bad ba ngin ïoh ban ai ïa ki sakhi hakhmat jong I, ngi lah hun ka mynsiem”, ong u Bah Golden Nonglong uwei na ki nongïalam jong ka VPP ha West Khasi Hills haba kren hakhmat ki pulit bad majistor ha phyllaw DC ophis.
“Ar kynta shiteng shu pynap sah ha khyrdop khlem kano kano ka jingïakren ne sngewthuh. Ngi donkam ïakren bad ka DC ban tip ruh la hato la dep thung ne em ïa ka kynhun tohkit ha ryngkat ka jingthoh”, u la ong hakhmat ki majistor shwa ban sa ïoh pdiang noh pat hadien kham hadien ïa ka jingthoh.
“Naduh ka sngi hatmajai ngi la dep ïakren bad ka DC ban pynsangeh shwa ïa ka jingshim interview, katba ym pat pyndep ïa ka jingtohkit. Hynrei hapdeng kata ka jingïakren, la ïohi pynban ba ki pynbna ban ïaid beit ïa ka interview. Kumta ngi hap ban wan biang ban dawa ïa kaei kaba ngi dawa ha katei ka sngi”, ong u Bah Robert Wahlang.
U la ong ruh, “Ha West Khasi Hills ha kine ki khyndiat por ba la dep, ka khana jingtyrwa die bad thied ban ïoh kam ka la pur naduh ki iew ki hat sha ki kyndong kynshrot. Hynrei haba ki don ki samla kiba nud ban ïakhun pyrshah ïa kane, ngi ruh ngim lah ban shu sngap hynrei ban dawa beit ïa ka hok kata ka long ban tohkit bad lap ïa kita kiba donkti”.
“La shu pynap sah ïa ngi ha khyrdop bad haba la pyrshang ban ïakren lyngba ki messages sha ki masjistor bad sha ka DC ruh, hynrei kine ruh kim ai ïa ka jingkren kaba shai bad la shu ap sah haduh 2 kynta bad ka interview pat ka dang ïaid shakhmat. Kumta ngim banse da ka bor ngi hap ban tur bad ynda la poi ha phyllaw ki sa ïa mih bad wanrah ruh ïa ka shithi kaba address sha u SP, ba yn pynlong ïa ka jingtohkit halor kane ka kam, katba ïa ka interview pat yn ïaid beit shakhmat. Hato kata ka lah ban long ?”, buh jingkylli u bah Robert.
“Ngi ïeng skhem ban dawa ba dei ban tohkit ban lap ïa baroh kiba donkti bad ba dei ban pynthitom, namar kane ka dei ka kam kaba ki samla wad kam na kylleng jong ka District ki la bitar, tangba ïa mynta ngin ap shwa haduh ban da dep ka jingtohkit”, u la ong.
U Dr Juristman Ïawphniaw MDC Nongstoiñ u la ong, “Ki kwah ïa ngi ba ngin pyni ïa ka jingdom jong ngi. Lah phra snem shiteng ka jingdom ka la ing hapoh ki nongshong shnong ka thaiñ, namar kane ka sorkar ka la sngap mynthi palat ïa ki jingdawa jong ki samla jong ngi ba kin ïoh ïa ka hok. Mynta lei la paw shai ba ïa kata ka hok ki samla ruh la tuh noh”.
“Ngi pynrem ruh ïa I Deputy Commissioner ba I kwah ban ïaid da kane ka lynti. Ha ka jingshisha I tip bha namar ngi la wan bunsien ban ïakren da ki lynti kiba jai jai bad ka sur kaba jem, ban ong ba kam dei ban don kaei kaei shalyndet kum ka jingïapynbam pisa, ba kan don bynta ha ka thungkam bad I la kubur ïa kata”.
“I da ong ruh ban sa pyndait ïa ki camera ha ki jaka thoh eksam hynrei ha ka sngi pynlong eksam la pynlip ïa ka lait baroh shi sngi ha Nongstoiñ. Hato kan don jingmut aiu kata ka jingpyndait camera. Kine baroh ki dei tang ki kam pynbiej lane shu ïalehkai jong ki heh sorkar ka MDA tang ban pynsngewbha ïa ki lok ki jor jong ki”.
“Nga don shibun ki jingbuh record naduh ki voice messages lane text messages ba ki khynnah samla ki pynpaw ba ka don shisha kata ka jingpyrshang ban shu thied bad die ïa ki kam ki jam. Ha iew ha hat lei ynnai ïakren shuh baroh ki la tip lut ba ha Nongstoiñ lada kwah kam, dei ban don ïa ka pisa kaba shong dor 5 lak ne 6 lak ban ïoh kam, khlem pisa ym donkam shuh ha Nongstoiñ”, u la ong.
“Ngi wan hangne ban ïakren da kaba shai hynrei tang u briew napoh ophis ban wan ïakren ïa ngi da ka burom ka akor ruh ym don satia. Ki phai ïa ngi da ka lyngkdong bad kim shym la kwah ban ïakren ïa ngi bad ki pynbor ïa ngi ban pyni bor pynban”, u la ong bad bynrap, “Mynta kin ïoh ban kynnoh lyngba ki paidbah ban ong ba ka VPP ka sniew, ka pyni bor ka leh don bor, ka leh kum ki gang. Hynrei ngim banse ban shim da ki lynti kiba eh ruh ha ka jingim jong ngi”.
“Ngim ju long kumne baroh shikatta ki lynti ïaid jong ngi, hynrei haba ka por kam shah shuh ïa ngi ba ngin shu shong mynthi, ngim banse ban tur ïa ka khyrdop bad rung la ka rung jubor. Ngi la don ka jingïatyngkhuh bad ki pulit ruh, hynrei ngi kwah tang kawei bad kata ka long ki kam ki dei ban ïaid beit ym da ki lynti ki bym ïahap”.
“Ngi kyntu ruh ïa ka Deputy Commissioner ba I dei ban shim ïa ka jingkitkhieh bad ki sienjam kiba dei kum ka khlieh duh jong ka District na ka bynta ka bha ka miat lang jong baroh”, u la ong.