Shillong, Risaw 02: U Bah Alexander Laloo Hek uba dei u MLA ka BJP na Pynthorumkhrah ha ka sngi Thohdieng u la plie paidbah ïa ka Thrive Sport Arena kaba la long trai da ka ïing ka sem jong u Bah Pius Marwein uba dei u MLA ka Ranikor, ha ka shnong Langkyrding.
Ha kane ka Thrive Sport Arena u Bah Hek ha ryngkat ka jingdon lang u Bah Pius lem bad ki nongkitkam shnong kila plie paidbah ruh ïa ka jaka jngi ne ka swimming pool, ka Gym, ka steam, ki jaka ïalehkai ki khynnah rit, ka jaka bam nalor kiwei pat.
Kane ka Thrive Sport Arena ka don hadien jong ka madan footsal kaba dei kaba la long trai hi na ka ïing ka sem u Bah Pius Marwein. Kane ka jaka kala biang lut naduh shading bad ka jingpynkhreh ruh ka long kaba itynnad bha.
Ha kane ka jaka baroh ki paidbah naduh ki tymmen, ki rangbah, ki samla bad wat haduh ki khynnah barit ruh ki lah ban wan sha kane ka jaka. Ha phyllaw, la shna ruh ïa ka Cafe bad ïa ka jaka pyngbyrngia ïa ki khynnah rit bad ka jaka ïeng kali kaba paka kaba pynsuk ïa kino kino kiba pynrung dkhot ïalade ban kilan met ha kane ka jaka.
Haba pyntip halor kane ka Thrive Sport Arena u Bah Pius u la ong ha kaba nyngkong um da kheiñ eh ba kane ka jaka kan ai ka jingkamai pisa, hynrei ka long ban ïoh ïa ka met kaba koit kaba khiah bad ban shaid ban khlaiñ.
Na ka liang u Bah Hek haba kren kum u kongsan ba kane ka Thrive Sport Arena kala kylla long kum ka Wellness Centre ka ban wanrah shibun ki jingmyntoi naka bynta ka koit ka khiah jong ki paidbah nongshong shnong ka jylla.
