Ai jingmynjur u Lat ka jylla ha kaba ïadei bad ka syrnod ST na ka bynta ka elekshon sha ka GHADC

Shillong, Nailur 30: Ka elekshon sha ka Garo Hills Autonomous District Council (GHADC) yn pynlong da ka thup thep vote ba la ka jong tang ki riewlum khlem kynthup ïa ki bym dei riewlum, hadien ba u Lat ka jylla u CH Vijayashankar u la ai ïa ka jingmynjur halor ka jingpynkylla ïa ka aiñ thep vote jong ka council.
Ki tyllong khubor ba thikna ki la ïathuh ba u Lat ka jylla u la ai ka jingmynjur ïa kane ka jingpynkylla ne ka amendment ha ka sngi Ba-ar, ka 29 tarik u Naiwieng.Hadien kane ka jingmynjur, ka sorkar Meghalaya ka la pynmih ïa ka jingpynbna jong ka GHADC (Second Amendment) Rules, 2026 ha ka Gazette ka jylla.
Kane ka jingpynbna kan pyntreikam ïa ka jingpynkylla (amendments) sha ka Assam bad Meghalaya Autonomous District (Constitution of District Councils) Rules, 1951.
Hapoh ka rukom pynkylla, ka Rule 8 la pynlong ïa ka Scheduled Tribe kum ka jinglong ba donkam ban ïaleh elekshon ha GHADC, ka Rule 128 ka buh ïa ka kyndon ST na ka bynta ki nongthep vote, bad ka Rule 129 ka ailad ban pynkhreh ïa ka thup nongthep vote ba la ka jong na ka bynta ka Council – da kaba pynduh noh ïa ka Assembly electoral roll.
Ïa kane ka sienjam la pynlong hadien ba ka GHADC ka la mynjur ïa ka amendment bill ha ka 10 tarik u Nailar, hadien ba ka la ioh ïa ka jingmynjur jong u Lat ha ka 6 tarik u Nailar ban wanrah ïa ka ha ka ïing dorbar.Ka jingpynkylla kaba kham mynshwa ïa ka Rule 8 la mynjur da ka council ha ka 23 tarik u Lber mynta u snem.
Kitei ki jingpynkylla ki long hadien ba ka Meghalaya High Court ka la weng noh ïa ka executive notification kaba kham mynshwa jong ka GHADC kaba la wad ban pynlong ïa ka ST certificate kaba donkam na ka bynta ki kyrtong, halor ka nongrim ba hap ban leh lyngba ka rukom thaw ain.Ka Council ka la thaw ha u bnai Jymmang 2025 ïa ka komiti ban bishar bniah ïa ki kyndon elekshon bad ban thaw ïa ka thup kyrteng la ka jong.
U Myntri Rangbah ka Jylla u Conrad K Sangma u la pynpaw biang ïa ka jingkular jong ka sorkar ban ïada ïa ki hok jong ki trai ri trai muluk, da kaba ong ba ka jingsynshar bad ka jingthaw polisi ka dei ban dang don ka jingkitkhlieh ïa ki jaidbynriew kiba ki thmu ban shakri.
Da ka jingpynjlan ïa ka samoi treikam jong ka GHADC kaba mynta haduh ka 18 tarik u Risaw hadien ba la pynkynriah noh ïa ka jingthep vote kaba dei ban long ha u bnai Iaiong 2026 namar ka jingkulmar ha Garo Hills, ka jingpynkhreh ïa ka thup kyrteng kaba thymmai mynta kan rai ïa ka por na ka bynta ka council election ka ban sa wan.