La lap ïa ki arngut shitnga kiba jah ha Nongjri suba ba ki shah pynïap dusmon
Mawkyrwat, Nailur 30 : Ki paidbah nongshong shnong ka thaiñ Nongjri ha ka por kumba 1 baje noh phai sngi jong ka 29 tarik u ‘Nailur, 2026 ki la lap ïa ki ar tylli ki metïap na ka shnong Nongjri, South West Khasi Hills District.
Ha ka kyrwoh ba la phah da u Bah B. Jyrwa, MPS, uperintendent of Police, South West Khasi Hills District la ong ba ha ka 28 tarik u ‘Nailur, 2026, ka Mawsynram Police Station ka la ïoh pdiang ïa ka ehjahar kaba ïadei bad ka jingjah jong ka Aijingsuk Kharbani bad u Kop Lapang, kiba dei shongkurim, ha ka 26 tarik u Nailur, 2026, ha ka por kumba 3:00 baje janmiet ha Ïew Nongjri, South West Khasi Hills District ha kaba haduh katei ka por, kine ki ar ngut kim pat wan phai sha ïing.
Shuh shuh ula ong ba hadien kane ka jingjia, la pyntip noh mar mar sha u Officer Incharge jong ka Nonghyllam Police Station, bad la pynlong ïa ka jingwad ïa kine ki arngut ha ki bynta jong shnong Nongjri. Hynrei, watla la pynlong ïa ka jingïawad, ym shym la lah ban lap ïa ki.
Kumta, da ka jingïai wad ïa ki, dei tat ha ka por kumba 1 baje ei ei nohphai sngi jong ka 29 tarik u ‘Nailur, 2026 la ïoh pdiang ïa ka jingtip na ki nongshong shnong jong ka Nongjri ba la lap ïa ki ar ki metïap ha kaba ha ka jinglap jong ki kim pat lah ban pynshisha la ki dei ne em ki ar ngut kiba la jah. Hynrei hadien ba wan poi ki ba haïing hasem, la lah ban pynshisha ïa kine ki ar tylli ki met ïap ba ki dei kiba la jah, u la ong.
U la bynrap ruh ba ki kyrteng jong ki ar ngut ki long u Kop Lapang, 32 snem ka rta, na shnong Um Shaw, Ri-Bhoi District bad kawei pat ka dei ka Aijingsuk Kharbani, 23 snem ka rta, na shnong Pungkung, East Khasi Hills District ha kaba kine ki ïa long shi kurim.
“Hadien ka jinglap, namar ka jinglong ba la kam pyut jong baroh ar ki metïap, la pynlong ïa ka post-mortem ha katei ka jaka ha kane ka step, hadien kata la aiti noh ïa ki metïap sha ki ba haïing hasem jong ki”, ong u SP.
Kumta, ha kaba ïadei bad kane ka jingjia, ka jingtohkit ka la ïaid shakhmat ban lap ïa ki jingshisha bad ban pynshai ïa ki jinglong bad ki daw kiba ïadei bad ka jingïap jong kine ki arngut.