Shillong, Nailur 30 : U Myntri Kampohiing ka Ri, u Amit Shah la khmih lynti ba un wan sha Shillong ha ka 4 bad 5 tarik Risaw, na ka bynta ka jingïalang ban pynkup burom da ka khusnam President’s Colour ïa ka Meghalaya Police ha ka prokram kaban long ha JN Stadium, Polo ha ka 5tarik Risaw.
Kumta na ka daw ka jingwan jong kiba bun ngut ki VIP bad ki kynrem ki lyndan, na ka liang ki bor pynïaid distrik jong ka East Khasi Hills District ka la buh ka jingmaham ban pynher drone sawdong jong katei ka jaka pynlong jingïalang.
Na ka liang u District Magistrate, Abhilash Baranwal, ha ka hukum kaba la pynmih hapoh ka Section 163 jong ka BNSS ha ka 29 tarik Nailur, u la pynbna ïa ka jingkhang ban pynher drone lane ka No-Drone Zone hapoh ka jingjngai 3 kilometre na JN Stadium.
Kane ka jingpyrkhing kan treikam naduh ka 2 tarik haduh ka 5 tarik Risaw.
Ka hukum ka ong ba la pynmih ïa kane ka hukum ex-parte namar ka jingdonkam kyrkieh, bad kan treikam mardor.
