Leh burom khatduh u President ka HYDC-CEC ha ka jingleit ontep ïa u nongïalam HYDC EJHD

Khliehriat nailur 30:- Ïa ka met ba sah jong nongïalam uba long u President jong ka Hynñiewtrep Youth Development Council na East Jaiñtia Hills District, u bah(L) Mihsalan Thoo la tep donburom mynta ka sngi ha lum jingtep ha shnong Rymbai East Jaiñtia Hills District bad ïa ka jinglehburom ba khatduh la pyndep da u President rangbah jong ka HYDC Central Executive Council, u bah Wyraiwan Sohtun lem bad ki dkhot ka seng.
Kum ban shu phai dien, u (L) Mihsalan Thoo u la khlad ha ka jingjia shah tynrah kali kaba la jia ha ka step phyrngap jong ka 29 tarik u nailur, 2026 ha surok national highway ha Lad Jyliah ha Mookhep.
Halor kane ka jingjia na ka liang ka seng HYDC hynnin ka sngi ka la leit buh da ka ejahar hakhmat u Superintendent of Police East Jaiñtia Hills District ha kaba ka seng ka la kyntu ïa ki bor pulit ban wad bniah ioh ka don kano kano ka daw halor ka jingshah tynrah kali u bah Mihsalan Thoo, ban peit bha ioh ka dei ka Hit and Run Case ban wad lyngba ki CC Tv kiba don hajan ban tip ïa ka kali ba tynrah, ban wad bniah ruh ban tip ïa ka por ba u shah tynrah kali.
Haba kren ha ka jinglehburom ba khatduh ha ïangsah u bah Mihsalan Thoo ha Rymbai, u President rangbah ka seng, u la pynsngew ïa ka history ne ka jingiaid lynti u bah Mihsalan kum u nongialam ka HYDC na East Jaiñtia Hills District bad u la ai ruh ki kyntien sngewlem ïa i kmie bad kiba ha iing ha sem jong u (L) Mihsalan Thoo.
U bah Wyraiwan Sohtun, ha ka sngi leh burom khatduh ïa u (L) Mihsalan Thoo, u la iathuh bad pynsngew ba “ u bah Mihsalan Thoo uba dei u President jong ka Hynñiewtrep Youth Development Council East Jaiñtia Hills District Unit, u dei u rangbah uba ju don ka jingangnud ban long ka sur jong ki paidbah na ka bynta ka bha ka miat ha ka imlang ka sahlang, ha kane ka jingdon jong u bad ka HYDC u la iakhun ban kyntiew ïa ka bainong jong ki briew kiba trei bylla ha ki dukan, ki pharmacy, ha ki petrol pum, kawei kaba shon mynsiem ïa nga ka dei kaba u la iathuh ha nga ba kito kiba trei bylla sait tiar ha Dosti Hotel ha Ladrymbai ki la kiew bainong mynta sha ka T7000 hajar tyngka, namar mynshwa ki ju ioh tang T5000 hajar, u la shimkhia ruh ha kaba ïadei bad ka jingdie tuh ïa ki dawai bad ba die ïa ki dawai kiba la palat ka taraik ba la buh ne expire date ha East Jaiñtia Hills, na kata ka daw ngi sngew burom bha ïa une u rangbah namar ka kyntien hi ka ong Ban shakri ïa u briew ka dei ka kam ban shakri ïa u Blei kam don kano kano ka kam ka ban kham khraw ban ïa ka kam ban shakri ïa ki paidbah, na ka liang ka seng ngi dap da ka jingsngewsih kaba khraw bha ba ngi duh noh ïa une u samla rangbah uba riew spah ha ka mynsiem bad ha ka pyrkhat pyrdaiñ na kabynta ban iarap ïa ki paidbah ka East Jaiñtia Hills bad ïa ka jylla hi baroh kawei, ka jingshimbynta u bah Mihsalam Thoo ha ka por ba ngi leit beh ïa ki dkhar bangla kiba don ha Shalang ka dei kawei ba ka sorkar ka la peitkhmat bad iaraoh ïa ka jingtrei shitom ki khun samla, ha East Jaiñtia Hills ruh ki don bun bah ki kam ba u bah Mihsalan u la trei na ka bynta ki paidbah kaba lehse phi baroh phim tip hynrei ki jingthoh bapher bapher kiba u thoh na ka bynta ki paidbah ki don ka jingthoh ha DC office ban iarap ïa ki paidbah, ka jingangnud jong u kaba khatduh ka dei na ka bynta kane ka dong kaba u sah ha shnong Rymbai ha kaba u la ong ba u kwah ban kyntiew ïa ka kam football ha ka dong ba u shong u sah”
U nongialam ka HYDC u la ong ruh ba ka jingkhlad u bah Mihsalan Thoo ka dei ka jingduh kaba khraw ym tang ïa ka seng hynrei ia ka ïing ka sem, ka shnong ka thaw, ka district bad ka jylla hi baroh kawei, hynrei dei pat ban shaniah ha ka jingpyniaid u Blei baroh ka dei ka mon ka jong u Blei “Nga kyrpad ïa ka ïing ka sem jong u bah (L) Mihsalan Thoo, bad ïa ka kur ka jait Thoo ba kim dei ban sngewsih shuh namar kane baroh ka dei ka mon ka jong u Blei kaba ngi kum ki briew ngim lah ban leh eiei ia ka mon u Blei” ai mynsiem bad kyntien jingpyntngen u bah Wyraiwan Sohtun..
U la kular ruh ba ka jingiadei jong ka seng HYDC bad ka ïing ka sem jong u bah Mihsalan Thoo kam pat kut bad ka seng kan ïai don lang don ryngkat bad ka ïing ka sem jong u bah Mihsalan Thoo ha kino kino ki jingeh ba kum ka ïing ka iakynduh bad ka seng kan nym klet ïa ki kam jong u Mihsalan Thoo kiba u la leh na ka bynta ki khun samla kina ha East Jaiñtia Hills District bad la pynkut ïa ka jinglehburom da kaba pyrta ïa ki kyntien phira jong ka seng “Ngin ieng tylli namar ka Ri”