ïalam u MLA bad MDC barim ïa ki nongbud na Jaiñtia ban pynïasoh sha ka BJP ha Shillong

Shillong, Nailur 28 : Ka Bharatiya Janata Party (BJP) ha Meghalaya ha ka Sngi Ba-ar, kala nang suhthied ha ri-lum Jaintia da ka jingwan pynïasoh ki MLA/MDC barim lem bad 200 ngut ki nongbud jong ki ha kaba u nongïalam ka party bad Myntri Sorkar Bah Sanbor Shullai ula ong ba ki paidbah ka Jylla kila ïohi shai ïa ki jingkynnoh pyrshah BJP.
U MLA barim ka Nartiang u Bah Draison Kharshiing bad u MDC ba rim ka Shangpung- Raliang u ma Lakhon Biam ki la leit ïasoh sha ka BJP ha ryngkat bad ki nongbud ha ka jingïalang kaba la pynlong ha Shillong.
Haba pdiang ïa ki sha ka party, u Bah Sanbor ula ong “Ngi pdiang sngewbha ïa u Bah Draison Kharshiing lem bad ki 200 ngut ki briew na ri-lum Jaintia sha ka longïing ka BJP. Kiba bun na ki, ki dei na ka Shangpung bad Raliang constituency”.
U Bah Sanbor uba dei ruh u Myntri ka Arts & Culture, ula ong ba kine ki dkhot thymmai ki dei kito kiba don mynshuwa ha ka NPP, VPP, Congress bad kiwei ki party.
Ula kam ba ha ka jingleit ïashim bynta jong u dang shen ha ki cultural prokram ha ri-lum Jaintia, kiba bun ki nongïalam ka thaiñ ki la wan kren ïa u bad pynpaw ba ki kloi ban ïasoh sha ka BJP.
“Ki la pyntip sha nga, ‘ngi kwah ïasoh sha ka BJP namar ngim don jingngeit shuh haki jingkynnoh lam ler ba ka BJP ka dei kaba shun ïa ki khristan bad kan khang bam doh masi’.
Kane ka dei ka jingkynnoh jong kiwei ki seng saiñ pyrthei arbnai lai bnai shuwa ki elekshon. Hadien ka elekshon, baroh ki ong “BJP ke Saath bhai bhai’ namar ki tIp ba hapoh ka jingïalam u Myntri Rangbah Duh U Narendra Modi, ka roi ka par bad ki jingmyntoi kan wan tang bad ka BJP” ong u Bah Sanbor.
Haba kynthoh tyngeh ïa ki seng saiñ pyrthei ba don ha Liang Pyrshah, ula ong “Ka bih ba la ber da kiwei pat ki seng saiñ pyrthei kam dei shuh kaba dang pdiang da ki paidbah ka ri-lum Jaintia bad ka Meghalaya. Ki paidbah ki la ïohi jngai bad ki la sngewthuh ba tang ka BJP kaba lah ban leh eiei halor ki jingeh jong ka Jylla”.
Haba pynpaw ia ka jingsngewskhem na ka bynta ka elekshon MLA 2028, une u nongïalam ka BJP ula ong “Ngi hap ban trei shitom ban poi sha man ki kyndong kynshrot jong ka Jylla. Lada ngi trei shitom, ngin sa thaw ïa ka Sorkar ha u 2028”.
Halor ki khubor hamsaia ba thmu pynshong synjor ïa ka sorkar MDA ba ïalam ka NPP, kaba ka BJP ruh ka dei ka paralok, u Bah Sanbor ula kyntait ïa kum kine ki jingkynnoh.
“Kam don satia kano kano ka jingthmu ban pynshong synjor ïa ka Sorkar. Ngi ai ka jingshaniah ba pura bad ka jingsngewskhem ha ka jinglong nongïalam u Myntri Rangbah u Conrad K Sangma” ula bynrap.