Dawa ka Pnar Student Movement ban buh biang ïa ka khyrdop talasi mynder ha surok Jowai-Dawki

Shillong, Nailur 29 : Ka Pnar Student Movement (PSM) ka kyntu ïa ka sorkar ba kan buh biang ïa ka khyrdop talase mynder ne ka Anti Infiltration Directorate Check Gate ha ka surok Jowai -Dawki namar ba la lap ïa ki sabut ba ka jur palat ka jingrung tuh ki mynder na Bangladesh lyngba ka thaiñ Dawki.
Ha ka dorkhast sha u Symbud Myntri Rangbah ka jylla uba dei peit ïa ka tnad kam pohïing u bah Prestone Tynsong mynta ka Sngi Ba Ar u President ka PSM u Embhah Passah u la ong ba ki bynta khappud ki la long laitlan palat hadien ba la weng noh ïa ka khyrdop talasi mynder kaba judon ha ka surok Jowai- Dawki.
Ka seng ka ong ba ka jingbym khlaiñ ka jingpahara ha khappud ka la pynïoh lad ïa ki mynder ban rung tuh na khappud Dawki shapoh Meghalaya bad kumta ka donkam ban don biang noh da kane ka khyrdop talasi mynder.
Ha ka shithi ka Seng ka la ong “ Ngi kwah ban pynpaw ïa kane ka kam kaba buh ïa ka jingma ïa ka jylla bad ïa ka ri hi baroh kawei ba ka sorkar kan shim khia noh kloi bad plie noh kloi ïa katei ka khyrdop talasi mynder ha kane ka surok Jowai- Dawki”.
Haba pynkynmaw ïa ka jingtreikam jong ka khyrdop talasi mynder la ong ba ka jingdon ha ki por mynshwa ka la pynlong ïa ki briew ba dei peit ban talasi ïa ki kali bad wat ia ki briew ruh kiba rung sha Dawki hynrei da ka jingweng noh ka long kumba plie lad ïa ki mynder bad ïoh rung katba mon.
Kumta ka seng ka dawa ban plie noh kloi ïa ka khyrdop bad buh ïa ki briew kat kum ka jingdonkam ban peit bad talasi ïa ki kali bad ki briew kiba ïaid ba ïeng bad dei ruh ban buh ha ka jaka kaba biang bha. Halor kane la dei ban jied ïa ka jaka da ki bor pulit ki bor synshar district. Dei ban pynkhlaiñ ruh ïa ki bor syntiat, ki bor pahara ha ki surok, ki lynti ïaid kjat, ki lynti ban rung na wah umngot sha Dawki bad kiwei kiwei ki jaka khappud.
Ka seng ka pynpaw ruh ba lada ka sorkar kam shim khia ïa kane ka kam kam banse ban ïaid da ki jingïakhih paidbah kat kum ki lynti jongka jingsynshar paidbah ban ïada ïa ki jaidbynriew trai ri, ïa ka jylla bad ïa ka ri hi na ki jingma.