Da ki kular thok kular shukor lyngba ki Social Media jop elekshon ka VPP leh aïu pat ha KHADC: Bah Prestone

Shillong Nailur 28 : U President ka NPP Meghalaya bad Symbud Myntri Rangbah ka Jylla Bah Prestone Tynsong u la kynnoh ïa ka Voice of the People Party (VPP) ba ka jop ïa ki election da ki jingïalam bakla suda ïa ki paidbah da ki kular thok bad kam thok lyngba ki Social Media bad mynta haba ki la ïoh ban synshar ha Khasi Hills Autonomous District Council (KHADC) ki leh aiu pat bad kiei ki kam pynroi pynpar ba ki la leh.
Haba kren ha ka rynsan ïalap election ha Wahlyngkhat ba la pynlong da ka NPP Pynursla Block na ka bynta u kyrtong ka NPP u Dr DRL Nonglait ha kane ka election MP Lok Sabha ba shiteng samoi, u bah Prestone ula ong, ba ula sngewthuh shai mynta ba ka jingrem elekshon ki kyrtong ka NPP ha u snem 2024 bad 2025 ka dei tang namar ka jingjur palat ka jingpynsaphriang ïa ki khubor thok ban ïalam bakla ki paidbah ha ki Social Media.
Ula ong, ba ha kine ki shisngi ne ar sngi kiba la dep, ula leit sha Delhi ha kaba ïadei bad ki kam sorkar hynrei la pynsaphriang ïa ki khubor thok ha ki Social Media, hana ba u Bah Prestone ula kwah ban long Myntri Rangbah ka Jylla bad la pynsaphriang thok ruh ïa ki khubor.
“Nga la leit Delhi ha ka 23 tarik bad u Symbud Myntri Rangbah u Bah Sniawbhlang bad u Myntri Rangbah u Conrad K Sangma ula wan ha ka 24 tarik Nailur. Ngi ïa don jingïalang bad ki heh ha Delhi. Hynrei la pynsaphriang ïa ki khubor kiba laiphew jait laiphew rukom haduh ba la duh thiah duh dem lut baroh ha kylleng sawdong jong ka jylla bad ka phone kaba la ïoh pdiang ka long, balei ki jia kumne bad kane ka dei ka jingkylli jong u paidbah” ong u Bah Prestone hakhmat jong ki hajar ngut ki paidbah kiba la wan sha ka jingïalang.
“Nga shu kwah ban pynkynmaw ïa phi ba ha ka elekshon ha u 2024 bad 25, pleng nga sngewthuh hangne, ba pleng kito ki artylli ki elekshon kiba ngi shah rem ki dei kiba ïaid da ka Social Media bad haduh katto ka treikam ka Social Media ban pynsngewthuh bakla ïa ki paidbah tang da kaba ki thoh laiphew jait laiphew rukom da kaba shu thok, shu jler bad nga kwah ba kiba kum kita ki briew kin ai jubab hakhmat jong ngi u paidbah” la ong u Bah Prestone uba long ruh u MLA ka Pynursla Constituency.
U Bah Prestone ula ther tyngeh ruh ïa ka Voice of the People Party (VPP) kaba ïalam ïa ka jingsynshar ha KHADC halor ka jingpynduh pyndam noh ia ka kyndon jong ka Land Act bad wat u Lat ka Jylla ula pynphai noh ïa katei ka Amendment Bill.
“Ka don kawei ka Amendment Bill jong ka Land Act, ym banse u Lat ka Jylla ula ong ba yn hap ban pynphai noh namar kata ka aiñ ka long bym ithuh shuh, ïa u Rangbah, ki bor Shnong, bor Raid, bor Hima, hana ym donkam shuh, baroh hap leh hangtei ha District Council. Nga lah pule bha bad nga tip bha bad ym dei ba nga shu kren tang ha ka social media. Nga lah pule iwei pa iwei i laiñ, ïa kata kaba ki leh ïa ka Amendment ban pynkylla kaba ktah ïa ka riti ka dustur bad khamtam eh ïa ki bor shnong ki bor thaw” ong u Bah Prestone bad ka kyntu ïa ki paidbah ka bri u Hynniewtrep ba ki dei ban bishar bad husiar bha.
Ha kaba ïadei bad ka jingïalap elekshon ïa u kyrtong ka NPP, u Bah Prestone ula ong, ba u Dr DRL Nonglait udei u riewrangbah uba shemphang, sngewrit, tipbriew tipblei bad uba don burom bad akor, kumta kan long kaba eh bha ban ïoh ïa kum une u riewrangbah bad ula kyrpad ïa ki paitbah ba kin ai ka jingkyrshan kaba pura bad ban pynjop donburom ïa u Dr DRL Nonglait ha ka elekshon shiteng samoi jong ka MP ka ban sa long.