Kular u Myntri Rangbah ban kyrshan ïa ki nongrep khamtam ha ka kam ri sniang bad rep syntiew

Shillong, Nailur 26 : U Myntri Rangbah ka Jylla u Conrad K. Sangma ula pynthikna ban ai jingkyrshan ïa ki nongrep khamtam ha ka kam ri sniang bad ha ka kam rep syntiew bad ka banjur ba ki prokram jong ka sorkar ki dei ban jam shaphrang ryngkat bad ka jingïoh ïa ki jingpynsngew ïa kiei kiba jia ha madan.
Ha ka ka prokram ‘Live with Conrad’, u Myntri Rangbah ula kren beit beit ïa ki jingeh kiba la pynpaw da ki nongrep kiba dei ki longkmie bad ki nongïoh jingmyntoi lyngba ka CM Elevate ha kaba ïadei bad ka kam ri jingri, ki lad kiba ïadei bad ki ïew ki hat bad ka jingpyntreikam ïa ki skhim haka rep ka riang.
Ki nongrep ki la ong, ba ki nongpynmih ki ju mad ïa ka jingeh ha ka ban pynmih bun ïa ki jingthung bad ïa ka jingseisoh ka jong ki.
La kdew ia ki jingeh hapoh jong ka CM Elevate Piggery Scheme, da kaba ong, watla ki nongïoh jingmyntoi ki la ïoh ïa ka jingkyrshan ban ri sniang, hynrei ban ïoh pat ïa ki nongthied ïa ki sniang ynda ki la heh la san, ka long kaba jynjar bha.
Halor ka jingseisoh jongka kam rep syntiew, la kylli ïa ka sorkar, la ka lah ban pynbiang ïa ki jingkyrshan ha ka ban pynïaid ïew, kaba kynthup ïa ka jingïarap beit beit ban pyndie ïa kine ki jingpynmih.
Haba pynpaw halor kitei ki jingsngewkhia, u Myntri Rangbah ula ong, ba ka sorkar ka la ïaid da ka jingbteng ban khmih na ki jinghikai na ki nongrep bad ban pynbha ïa ki skhim katkum ka jingshemphang.
“Haba ngi lah sdang treikam da ka jingthmu ban ïarap ïa ki nongrep, ngim shym la don lypa ïa ka lad ban pynbeit ïa ki jingeh na ka bynta kiei kiei baroh ne ban ïoh lut ïa kiei kiei kiba dei lut naduh kaba sdang” ula ong.
Ula ong, ba ka jingai jingkyrshan ha ka kam rep ka dei ban ïaid ha baroh ki liang, naduh ki symbai, jingkyrshan da ka song tyngka, jingpynïasoh bad ki ïew bad ka bynrap ba ka jingpynsngew na ki nongrep ka long kaba kordor bha ïa u bad ïa ka sorkar ba kin tip ban wan ki lad ki lynti kumno ban ïarap shuh shuh ïa ki nongrep.
Halor ka kam ri sniang, u Sangma ula batai ba ki prokram kiba mynshwa ki la mad ïa ki jingeh namar ba ki sniang kiba la wanrah nabar ka jylla kim lah ban im bha hapoh Meghalaya na ka jinglong jingman jong ka suiñbneng bad ka la lam sha ka jingiap jong kine ki jingri.
Ka sorkar mynta kala jam shakhmat ban sam ïa bunjait ki khun sniang kiba la pynmih hi ha ka jylla bad kala wanrah ruh ïa ka rukom ai jinghikai kaba kongsan hapoh jong ka CM Elevate Piggery Scheme ban kyntiew kumno ba kin im bad ruh ban pynmih bun.
Halor ki jingsngewkhia kiba ïadei bad ki ïew ki hat kiba la pynpaw da ki nongrep, u Sangma ula pynpaw ba ka la don ka jingïatreilang hapdeng ka sorkar bad ki kynhun shimet ha ka kam rep ïa ki syntiew ki skud.
Hapoh jong katei ka Model, ki kynhun shimet ki ïatreilang bad ka sorkar bad ki nongrep ban pynbiang ïa ki tynrai, ka jingai jinghikai bad ka jingthied kylla. Ka jingthmu ka long ban pynbiang ïa ki nongthung bad ka jingpynthikna ïa ka ïew bad pynduna ïa ka jinglut bad ïa ka jingma ha ki ïew ki hat kiba ïadei bad jingdie ïa ki jingpynmih ki jongki.
U Myntri Rangbah ula ong, ba kum kitei ki jingtuklar ki dei da ka jingthmu ban pynlong ïa ki skhim sorkar kiba ïadei bha bad ki nongrep da kaba shimkhia ïa ki jingeh ha ki bynta baroh kiba ïadei bad ka jingpynmih bad ka jingpynïaid ha ki ïew ki hat.
Kane ka jingïakren ka pyni ruh ïa ka jingpyrshang ka sorkar ban shim beit beit ïa ki jingpynsngew na ki nongrep ban pynbha shuh shuh ia ki prokram bad ban pynkhlaiñ ïa ki lad kamai ha ka jylla Meghalaya khamtam ïa ka ïoh ka kot ha ki thaiñ nongkyndong.