Khlem jingbit wat ym thaw ïa ki Social Media Group ha ka kyrteng jong ka Seng: Kyntu ka VPP

Shillong, Nailur 27 : Ka Voice of the People Party (VPP) ka kyntu ïa ki paidbah, kynthup ïa ki dkhot bad ki nongkyrshan jong ka, ba kin ym thaw ïa kino kino ka social media group, kum ki WhatsApp group, Facebook page bad kiwei kiwei, ha ka kyrteng jong ka Party, lait noh tang ïa ki group kiba la pynmih ne la ai jingbit da ka Party.
“Watla ngi la ju bthah ïa kane sha ki dkhot bad nongkyrshan jong ka Party na ka por sha ka por, hynrei ka Party ka sngew donkam ban pynpaw biang ïa kane lyngba ki lad pathai khubor, khnang ba kan long ka jingpynshai ïa kiba bun,” ong u Nongai Ktien ka Party, Dr. AW Rani ha ka kyrwoh.
Shuh shuh la ong ba ka Party ka la ïoh jingtip ba don ki social media group kiba la thaw ha ka kyrteng jong ka VPP khlem ka jingtip, jingmynjur ne jingbit na ka Party.
“Kumta, ka Party ka kyrpad ïa kito kiba la thaw ne pynïaid ïa kum kine ki group ba kin pynduh noh ïa ki. Ka VPP ka kyntu ruh ïa baroh ki dkhot, nongkyrshan bad ki paidbah ba kin sngewbha ban bud ryntih ïa ki rukom treikam bad ki jingpynbna kiba wan na ki nongïalam jong ka party khnang ban lait na ki khubor kiba bakla, jingkulmar bad ka jingpyndonkam bakla ïa ka kyrteng jong ka Party,” la kyntu shuh shuh ka kyrwoh na ka VPP.