Leit khang bad phah mih ïa ki nongtrei Bank ha Mawkyrwat, Ranikor & Mawsynram

Mawkyrwat, ‘Nailur 27: Ka Federation of Khasi Jaiñtia Garo People’s (FKJGP) jong ka South West Khasi Hills District, mynta ka sngi ka 27 tarik u Nailur, 2026 hapoh ka jingïalam u Bah Kenesjune L. Nonglait uba dei u President, ki la leit ban khang ïa ki shnat treikam jong ki Bank kiba plie bad thmu ban treikam ha ka Sngi U Blei, ha ki bynta bapher bapher jong ka Mawkyrwat bad Ranikor.
Kane ka jingleit khang jong ka seng ka long kum ka dak jong ka jingpyrshah ïa ka rukom treikam jong ki Bank ha ka Sngi U Blei. Ka seng ka la pynpaw ba Meghalaya ka dei ka jylla kaba bun bha ki riewngeit Khristan, bad ka jingdawa jong ka ka long ba dei ban burom ïa ka Sngi U Blei, kaba long ka sngi kyrpang ha kaba ki Khristan ki leit sha ki Ïingmane ban shakri ïa U Blei, ym ban leit trei ha ki ophis sorkar ne ki Bank.
U Bah Kenesjune L. Nonglait, President ka FKJGP, South West Khasi Hills District, u la ong ba ka seng kam pyrshah ïa kano kano ka kynhun niam, hynrei ka kyntu ïa baroh ban burom ïa ka jingngeit bad ka rukom im jong ki Khristan kiba bun ha ka jylla Meghalaya.
Ha kajuh ka por, ka FKJGP jong ka South East Khasi Border Circle, hapoh ka jingïalam u Samla Omar Shangdiar, Publicity Secretary, hadien ba ka la ïoh jingtip ba ka State Bank of India (SBI), Mawsynram Branch, ka la plie bad treikam ha kane ka Sngi U Blei, ka la leit mar-mar sha katei ka jaka ban khang khyrdep ïa ka shnat Bank.
Lyngba ka kyrwoh, ka seng ka la maham ïa baroh ki Bank kiba don ha ki thaiñ bapher bapher ba lada dang lap biang ba ki plie bad treikam ha ki Sngi U Blei, ka seng kan shim ïa ki sienjam kiba tyngeh katkum ka rai jong ka seng.
Ka FKJGP ka la phah ruh ïa ka kyrwoh sha ka Sorkar Jylla ba kan shimkhia halor kane ka bynta, khnang ban ïada na ka jingjia kiba kum kine ha ki sngi ki ban wan.