Ïohbat ki pulit Umkiang 3 tylli ki bike ba rongtuh na Assam bad thmu ban die tuh sha Bangladesh

Khliehriat, Nailur 27: Ki pulit jong ka Umkiang Patrolling Post, East Jaiñtia Hills District, hynnin ka sngi ki la lap bad bat noh ïa ki lai tylli ki kali ar shaka lane ki motor bike kiba la shu rong tuh na jylla Assam bad thmu ban dei tuh bad die beaiñ sha ri Bangladesh.
U Superintendent of Police, East Jaiñtia Hills District, u Shailender Bamaniya,IPS u la ong ba hadien ba la ioh jingtip na ki tyllong ai jingtip kiba tikna, ba ki don ar tylli ki ki motor bike kiba la shu pynieng ha ka jaka khlaw ha ka dong Wahkoh ha shnong Umkiang, mar mar ki pulit ki la leit ban peit bad lap ba don ki motor bike Royal Enfield Bullet 350 kaba don u registration number AS11U6803 bad kawei ka Bajaj Discover kaba don u number AS11S1235, ïa kine ki ar tylli ki bike la lap na kawei ka jaka khlaw bad lap ba ki wiring jong ki bike la pynkylla.
Shuh shuh hadien kane, ki pulit ki la ioh jingtip biang ba don sa kawei ka bike motorcycle kaba wan na ki thaiñ Ratachera sha Umkiang, ki pulit ki la ap lypa bad ynda la poi kane ka bike ki la beh bad kthong, ha kane ka jingkthong ki pulit, uba ñiah ïa kane ka bike u la shu buh noh ïa ka bike ha rud surok bad phet krad sha khlaw ban lait na kti ki pulit da kaba shim kabu ïa ka jingdum bad jingrben ki khlaw, kane ka bike ka dei ka Hero Xpulse motorcycle, rong saw – iong ka bym don number bad kane ruh lka a don ka jingpynkylla ha ka wiring bad la suba ba ka dei kaba la shu rong tuh na Assam.
Ïa kine ki lai tylli ki motorcycles (bike) la rah noh da ki pulit sha Umkiang PP ha ka jingpeit jong ki pulit.U Bamaniya u la ong ba la lah ban tip ïa ki trai jong kitei ki motorcycle lyngba ka e-challan bad haba iakren bad ki trai ki la pynshisha ba ki dei ki motorcycle jong ki bad ki dei kiba la shu rong tuh na Silchar, Assam bad ki la dep ujor ruh da ka ejahar ha Arunachal Police Outpost kaba hap hapoh Silchar Police Station.
Ïa kitei ki lai tylli ki motorcycles la aiti noh sha ki heh pulit jong ka Arunachal Police Outpost ba hapoh ka Silchar Police Station, Cachar District, Assam ba kin leh ïa ka kam ba dang sah kaba katkum ka aiñ.