Khlad noh u Bah RG Lyngdoh u nongïalam ban wanrah jingsuk, yn leit on thang ha 31 tarik

Shillong, Naitung 29: U Bah Robert Garnett Lyngdoh ba ki paidbah ki kham sngewtynnad ban khot u Bah RG ne u Bob, u la khlad noh ha ka 29 tarik Naitung 2022 ha ka por 11:40 baje mynstep ha ïing sah jong u ha Nongrim Hills, Shillong. U la dap 62 snem ka rta.
Ka jingleit on thang ïa u kan long ha ka 31 tarik mynta u bnai por 1 baje na ïing jong u bad nangne yn rah sha jaka thang briew jong ka sorkar ha Upper Mawprem. Katkum ka jingïathuh i Kong Ampareen Lyngdoh, ipara jong u, la ong ba kane ka jingthang ïa ka met jong u Bah RG Lyngdoh, kadei ka jingkwah jong u hi bad kum ka ïing ki burom ïa kane ka jingkwah.
U Bah RG Lyngdoh, udei u MLA barim jong ka Laitumkhrah ha kaba u la mih khmat naduh ka snem 1998 haduh ka snem 2008. Ha ka por ba u long MLA, u la long ruh u Myntri ka sorkar jylla bad bat ïa ka tnad pohïing, ka tnad pule puthi bad kiwei kiwei.
U la long uwei na ki nongïalam kiba tbit bad u bym ju riej ban kren ïa ka jingshisha. Udei ruh uba kwah ban wanrah ïa ka jingshongsuk ha ka jylla da kaba pynduh ïa ki kam sniew kiba bun jait khamtam na ki Seng Kaikhlaw.
Ha ka por ba u jop nyngkong kum u MLA na ka Congress, ka Seng ka la shong ha ka liang pyrshah bad dei u Bah RG Lyngdoh, uba la ai jingmut ïa ka Liang Pyrshah ba don ka Shadow Cabinet. Ha ka snem 2008, u la shongthait noh na ka kam saiñpyrthei da ka jingmih ïakhun elekshon noh i para jong u, i Kong Ampareen Lyngdoh.
U Bah Lyngdoh, u la don hapdeng ka jingshitom kaba jur ha kine ki taïew baladep, ha kaba la pynkit noh ïa u sha Hospital ban shah sumar. Hynrei katto katne sngi u la mih noh na Hospital ban wan sumar noh ha ïing tad haduh kane ka sngi ba un da khlad noh.
U la shah sospon bad shah beh noh na ka Congress tad haduh ban da pynrung biang ïa u sha ka Seng ha ka 8 tarik u Nailur 2021, hadien ka jingwan shimti u Bah Vincent Pala kum u President ka Meghalaya Pradesh Congress Committee.
Ka jylla bad ki paidbah kin kymaw ïa u ym tang kum u nongmihkhmat paidbah, hynrei kiba bun kiwei pat ki kam ba u la leh ba ka jylla kan kynmaw ïa ki kam jong u.
Dei ha ka por jong u ba ka Meghalaya ka la paw ha ki artylli ki record jong ka Guniess Book of World Record. Kawei kadei ka jingïatem ksing kaba bun tam shisien tem ne ka Drum Ensemble, ha kaba 7,951 ngut ki paidbah naduh ki rangbah, ki longkmie, ki samla haduh ki khynnah ki la ïashim bynta ha prokram ba la pynbeit da ka Meghalaya Tourism Development Forum (MTDF).
Kane ka prokram ka la long ha JN Stadium, Polo ha ka 28 tarik u Risaw 2006 kaba long ruh kum shi bynta ban pynkhreh ïa ka jingpynlong ïa ka Autumn Festival.
Nangta sa kawei pat ka World Record kadei ha ka jingïatem Guitar lang ha kajuh ka por shisien tem ne ka Guitar Ensemble kaba la pynlong ha Polo ha ka 31 tarik u Risaw 2007 bad 1730 ngut ki paidbah ki la ïashim bynta ban pynpra ïa ka World Record.
Dei ha ka por jong u ruh ba u la kren tyngeh ïa ki kam beaiñ jong ka HNLC, kaba ha katei ka por ka dang khlaiñ bha bad leh bun ki kam pyntriem, khamtam ki kam dawa pisa, ka jingkhot pakhang shnong ha ki sngi rakhe laitluid bad kiwei kiwei. U Bah RG Lyngdoh, ha kawei na ki sngi rakhe laitluid ha Polo, haba ka HNLC ka la khot pakhang shnong, u la ïalam ïa ki paidbah ban ïaid kjat naduh na ïing jong u na Laitumkhrah shaduh Madan Polo ban leit ïashim bynta ha ka jingrakhe Sngi laitluid jong ka ri India.
Shuh shuh udeu ruh u briew uba ieit ïa ka rwai ka siaw, ha kaba u la ju long u dkhot ban rwai bad tem na kynhun nongrwai Mojo bad Great Society.
Hadien ba u la shongthait na ka kam saiñpyrthei, u Bah Lyngdoh, u la bat ruh kum u Vice Chancellor jong ka Martin Luther Christian University (MLCU) bad dei ha ka por jong u, ba ka MLCU ka la ïakhlad lok noh na ka jingïatreilang bad ka KJP Assembly bad kynriah jaka treikam ruh na ka ïing jong ka KJPA sha ka jaka ba don mynta ha Nongrah.
U dang angnud ban pynkhlaiñ biang ïa ka Congress:
Ha ka jingshisha u Bah RG Lyngdoh, ha ka por ba la pdiang sngewbha biang ïa u sha ka Seng Congress haka 8 tarik u Nailur 2021, u la pynpaw ka jingangnud ban pynkhlaiñ biang sa shisien ïa ka Party. Haba kren ha katei ka jingïalang, u Bah Lyngdoh, u la ong ba ka daw ka jingtlot jong ka Congress, kadei namar ba ki nongïalam kim shym la trei na ka bynta ban pynmih sa kiwei pat ki nongïalam ki ban shimti na ki, pynban ki ïaleh ban pynduh jait ïa ki.
Ha katei ka jingïalang, u Bah Lyngdoh, u la pynpaw ba ka Congress kadei ban don ki jingtreikam kiba khuid kiba suba, namar ba ki paidbah ki la shah ban beiñ eh ha ka jingsynshar kane ka sorkar ba mynta. U la khot la wer ïa ki dkhot bad ki nongtrei jong ka Seng ban ïatreilang hapoh ka jingïalam u Bah Vincent Pala kum u President jong ka Meghalaya Pradesh Congress Committee (MPCC) bad u la pynpaw ka jingsngew skhem ba lada ki nongïalam ki trei shitom bad ki nongkyrshan ki trei shitom, ka Congress kan sar ha ka elekshon MLA 2023.
Hynrei hadien katto katne bnai na katei ka jingïalang, ka Congress kala duh noh shuwa ïa ki 12 ngut ki MLA hapoh ka jingïalam u Dr. Mukul Sangma, kiba hadien ki la leit pynïasoh noh bad ka All India Trinamool Congress bad pynmih ïa ka Meghalaya Pradesh Trinamool Congress. Hadien kane pat kala duh noh sa ïa ki 5 ngut ki MLA kiba la leit ban ai jingkyrshan noh ïa ka sorkar MDA ba la ïalam da ka NPP, da kaba pynpaw ïa ka jingbym sngewtynnad ïa ka jinglong nongïalam u Bah Vincent Pala. Kine ki 5 ngut ki la shah sospon ha ka Party bad ka Congress mynta kam don MLA satia ha Meghalaya.
Na ka liang ka Congress ka la pynlong ka jingïalang sngewlem mynta ka sngi ha Congress Bhavan, Shillong hadien ba ka la ïoh jingtip ïa ka jingkhlad noh jong u. Ka Seng kaba la pynlong ruh ka jingsngap jar kaba ar minit ban kynmaw burom ïa u, ka la pynkynmaw ïa ki kam ba u trei bad pynkynmaw ruh ba hadien ba u la wan phai biang sha ka Seng, u la bat kum u President jong ka Nongthymmai Block Congress Committee.
U Bah Prestone Tynsong, Myntri Rangbah Symbud jong ka jylla, uba la poi ha ïing u Bah Lyngdoh tang mar ïa tip ïa ka jingjia, u la ong ba u Bah RG Lyngdoh, udeu u briew u bym ju riej ban kren ïa ka jingshisha bad u nongïalam uba ïohi jngai. U la ïathuh ba dang ha ka 18 tarik mynta u bnai, ma u bad u Myntri Rangbah, u Conrad Sangma, ki la leit shongkai bad u haduh kumba 40 minit eiei ha kaba haduh katei ka khyllip mat, u dang pynpaw ka jingangnud ban wanrah ka roi ka par ha ka jylla.
Na ka liang u Lat ka jylla, u Satya Pal Malik ruh u la pynpaw ka jingsngewlem halor kane ka jingkhlad noh u MLA barim ka Laitkumkhrah da kaba ong ba ka jylla ka la duh noh ïa uwei na ki nongïalam ba shemphang jong ka.
U Bah Sanbor Shullai, MLA ka South Shillong ruh u la pynpaw ka jingsngewlem halor kane ka jingkhlad noh u MLA barim ka Laitumkhrah.