Shillong, Nailur 25: Ka Hynñiewtrep Youths’ Council (HYC) ka kyntu ïa ka North Eastern Indira Gandhi Regional Institute of Health and Medical Sciences (NEIGRIHMS) ba ka dei ban sdang noh mardor ban thungkam ïa ki Nursing Officer ban pyndap ïa ki kam ba thylli.
Ka HYC ka la aiti da ka jingthoh sha u Director, NEIGRIHMS, bad ka la ïakynduh ruh ïa u ban buh ïa ki jingeh bad ki jingdawa jong ka seng kiba nang sahteng.
U President ka HYC u bah Roy Kupar Synrem u la ong ba ka HYC kala dawa ba ka jingpynbna thungkam Nursing Officer ka dei ban long katkum ka ratio 80:20 hapdeng ki kynthei bad ki shynrang.
“Ka Council ka la pynskhem ba kum kane ka jingpynbeit ïa ka jingdon nos shynrang bad kynthei ka long kaba donkam haba pyrkhat ïa ki jingdonkam ha ka jingsumar hapoh ka hospital khamtam ha ki jingsumar obstetrics bad gynaecology, maternity care, paediatrics, neonatal care, post-operative care” ong u Bah Roy.
Ka jingpynpaw ka la kdew ïa ka rai ba dang shen jong ka Ïing Bishar Bombay ha ka mukotduma Niketan Prakash Lingayat & Another pyrshah ïa ka Jylla Maharashtra bad kiwei kiwei, kaba la rai ha ka 12 tarik u Lber 2026, bad ki rukom thung kam jong ka Sorkar Pdeng kiba la don lypa ha ki jaka pule kum ha AIIMS, ka JIPMER bad kiwei kiwei haba ïadei bad ka jingthungkam katkum ka 80:20 female-to-male ratio haka kam Nursing Officer recruitment.
U Bah Roy ula pynshai ba katei ka jingdawa kam dei pyrshah ïa ki Nurse Officer shynrang.
“Ka jingdawa jong ka kam dei pyrshah ïa ki Ophisar Nurse shynrang, hynrei ka wad ïa ka rukom thung kam kaba pynthikna ïa ka jingdon kaba biang jong ki Ophisar Nurse kynthei ha ki tnad ha kaba ka jinglong kyrpang jong ki nongpang, ka burom bad ka jingsumar kaba ïadei bad ka shynrang bad kynthei ka long kaba kongsan bha,” u la ong.
Ka HYC ka la kyntu ruh ïa ka NEIGRIHMS ban ai ïa ka jubab da ka jingthoh bad ka Plan treikam kaba shai bad kaba buh por na ka bynta ban pyndap ïa ki kam ba lait.
“Ki bor pynïaid ka NEIGRIHMS ka dei ban shimkhia mardor ïa kine ki jingdawa kaba dei hok na ka bynta ka jingmyntoi jong ki nongpang bad ki paidbah ka Meghalaya bad ka thaiñ shatei lammihngi baroh kawei,” ula bynrap.
