Shillong,Naitung 29 : U MLA barim ka Mawlai ba dei ruh u nongialam ba rangbah jong ka UDP Mawlai Bah Embhalang Syiemlieh ryngkat bad ki spah ngut ki nongkyrshan ba radbah ka UDP na katei ka constituency ha ka sngi Thohdieng ki la pynbna ba ki la resaiñ paidbah na katei ka party.
Ia katei ka rai la shim ha ka jingialang paidbah kaba long ha Ïing sah jong u Bah Embhah hi ha Mawlai ha katei ka janmiet.
Kiba bun kiba poi sha katei ka jingialang ki dei ki nongialam jong ka UDP Mawlai kiba la shah weng noh kum ki nongialam khlem ka jingtip jong ki.
“Ngin leit beit ban kyrshan ia kino kino ki kyrtong kiba i Bahdeng Embhah i leit ban kyrshan bad pynjop hi ruh,” ong i President ka UDP Women’s Wing ba la shah weng noh.
Uwei pat u nongialam ba ju bat kum u Publicity Secretary ba la shah weng noh u la ong ba ia katei ka kam ki la rah ruh ha ka Central Executive Committee jong ka party hynrei katei ka kam kam shym la poi shaei shaei.
Kitei ki nongkitkam jong ka UDP Mawlai ki la iathuh ruh ba ka daw kaba pynlong ia ki ban shim ia katei ka rai ka long na ka daw ba kitei ki nongialam ba thymmai kim ithuh satia ia ki nongialam barim hynrei la shu iaid lait lut ia ki baroh.
Na ka liang u Bah Embhah u la pynpaw ba wat hadien ba ki la phah tuklar ia katei ka kam ha ki nongialam ka UDP hynrei kam shym la don satia ka jingshimkhia na ka liang jong ki kaba poi haduh u pud ba ki hap ban shim ia katei ka rai.
“Nga kmen ka mynsiem ba katne spah ngut phi wan ban don bad shim lang ia ka rai ryngkat bad nga ban mih noh na ka party kaba ngi la pynheh pyn san la 15 snem,” u la ong.
