Plie paidbah u MR ïa ka SEWA Inland Dream Rehabilitation Centre ha Gambagre ban ïakhun pyrshah drok

Gambegre, Nailur 22 : U Myntri Rangbah ka Meghalaya, u Conrad K. Sangma ha ka sngi Baar, u la plie paidbah ïa ka Sewa Inland DREAM Rehabilitation Centre ha Gambegre, South West Garo Hills, ha ka jingdonlang u MLA na ka thaiñ u Subir Marak.
Kane ka centre ka dei ka centre kaba nyngkong ha ki rilum Garo kaba ïoh jingïarap na ka Sorkar bad kaba 15 ha ka jylla Meghalaya. Shuwa ban sdang ka DREAM Mission, ka jylla ka don tang 9 tylli ki rehabilitation centre. Mynta ki la poi sha 15 tylli, bad 10 tylli ki ïoh jingïarap na ka Sorkar.
Ha kane ka sngi, u Myntri Rangbah u la pynmih ruh ïa ka Standard Operating Procedure (SOP) kaba nyngkong jong ka jylla na bynta ki rehabilitation centre. Ka SOP ka buh ïa ki kyndon na bynta ka jingsumar, jingpdiang bad pyllait ïa ki nongpang, counselling, jingshngaiñ bad ki kamram jong ki nongtrei.
U Conrad K. Sangma u la ong ba naduh u snem 2018, ka Sorkar ka pynleit jingmut ha ka jingïatreilang bad ki kynhun bapher bapher, khamtam ki samla, ki kynthei bad ki nongrep.
U la ong ba ka jingïakhun pyrshah ïa ki drok ym lah ban jop tang da kaba tei ïa ki rehabilitation centre, hynrei donkam ban ai ïa ki samla ki lad ban leh ïa ki kam kiba bha bad ban lait na ki drok.
U Myntri Rangbah u la kyntu ruh ban pynshlur ïa ki khynnah ban pule kot bad ban pynduna ïa ka jingpyndonkam mobile. U la bthah ban pynbha ïa ka District Library ha Tura, khnang ban long ka jaka kaba sngewtynnad bad kaba suk ïa ki khynnah bad samla.
U la ong ruh ba ka Sorkar ka kwah ban pynkylla ïa ki library ha kiwei pat ki district sha ki centre ban ïashim bynta ki samla.
U Myntri Rangbah u la ong ba ka DREAM Mission, kaba la sdang ha ka 26 tarik Jylliew 2023, ka long ka mission kyrpang jong ka jylla ban ïakhun pyrshah ïa ka jingpyndonkam drok. Ka mission ka pynïatreilang ïa ki Pulit, ka Koit ka Khiah, Social Welfare, Pule Puthi, district administration bad ka imlang sahlang.
Ka centre ha Gambegre la pynkylla na ka Tribal Girls’ Hostel kaba la don lypa. Kane ka rukom ka ïarap ban pynkloi ïa ka jingpyndonkam ïa ka building bad ban lait na ka jingeh ban wad jaka thymmai.
Ka centre kan trei ryngkat bad ka Detoxification Centre ha Tura Civil Hospital. Ka detoxification kan peit ïa ka jingsumar kaba nyngkong, katba ka rehabilitation kan ïarap ïa ki briew ban wanphai biang sha ka jingim kaba kham bha.
Ïa ka centre la seng ryngkat bad ka Sewa Inland, kaba dei ka kynhun kaba trei bad ka imlang sahlang bad ki kynhun niam. Ka Sorkar ka la ai jingïarap bad jingdon jingtei, katba ka Sewa Inland kan pynïaid ïa ka centre.
Ka Sorkar ka la pyntreikam ruh ïa ka Recovery Tracker Portal ban tip ïa ka jingdon ki jaka thiah ha ki centre. Ka dang pynkhreh ruh ïa ka DREAM Solace Home, ka halfway home kaba kyrpang, ka jingïada na ki drok ha ki skul lyngba ka NAVCHETNA module bad ka jingwad bniah halor ka jingpyndonkam drok ha baroh kawei ka jylla.
Ka bor ban ïakhun ïa ki kam drok ka la nang khlaiñ ruh lyngba ka Narcotics K9 Unit kaba don hynriew tylli ki ksew sma dien.
U Myntri Rangbah u la ïaroh ïa ka jingkhuid jong ka Maternity and Child Hospital ha Tura bad u la bthah ïa ki ophisar ban pynbha shuh shuh ïa ki kamra na bynta ki kmie, kynthup ban buh air conditioning ha ki katto katne ki jaka.