Ka jingpyndait Air Purifier ha Byrnihat ka dei tang ka jingpyrshang hynrei lah ban pynheh lada seisoh : Sosthenes

By Mawphor Editor On Sep 23, 2026

Shillong, Nailur 22 : U Myntri Sorkar bad MLA ka Jirang, u bah Sosthenes Sohtun, ha ka sngi Ba-ar u la ong ba ki air purifier kiba la pyndait ha Byrnihat ki dei tang na bynta ka jingpyrshang (trial), bad lada kane ka jingpyrshah ka jop, ka sorkar kan pyrkhat ban pynheh ïa ka pilot project.
U la kren ïa kane haba jubab ïa ki jingkylli halor ka jingjaboh ka lyer ha Byrnihat, kaba la kdew kum kawei na ki sor kiba jur tam ka jingjaboh ka lyer.
“Ki air purifier kiba ngi la pyndait, ki dei tang na bynta ka trial. Lada ka jingpyrshang ka jop, hangta ngi lah ban leit sha ka pilot project,” ong u Bah Sohtun.
U la ong ruh ba lada 2–3 tylli ki air purifier kiba la pyndait ki treikam bha, bad lada pynheh ïa ka jingdon jong ki, kane kan ïarap ban pynhiar ïa ka jingjaboh ka lyer ha Byrnihat. U la bynrap ba u la kyrpad ïa u Myntri Rangbah ban bteng ïa ka pilot project lada ki jingmih na ka jingpyrshang ki long kiba bha.
Haba kren halor ka jingpynkhreh ïa ki kyndon, u Bah Sohtun u la ong ba la thaw ïa ka Joint Action Committee (JAC) ryngkat ka Meghalaya State Pollution Control Board (MSPCB), ki Rangbah Shnong bad kiwei ki tnat sorkar, khnang ba ki paidbah kin lah ban ujor beit lada don ki karkhana kiba pynkheiñ ïa ki kyndon.
“Ka JAC ka ailad ïa ki paidbah, ki Rangbah Shnong bad kiwei ban ujor beit lada kino kino ki karkhana ki pynkheiñ ïa ki kyndon kiba la buh da ka MSPCB,” u la ong.
U la ong ba ka jingtrei kam ka paw shisha ha madan bad kam dei tang ha ki kot ki sla.
“Ngi la ïohi ba bun ki karkhana, hadien ba la wan ki jingujor bad ka MSPCB ka lap ba ki la pynkheiñ ïa ki kyndon, la khang ïa ki,” u la ong.
Haba kylli ïa ka jingbun ki jingujor kiba la ïoh haduh mynta, u Bah Sohtun u la ong ba um dei u nongïalam jong ka committee bad ïa ki jingtip kiba bniah dei ban pan na ka Board.
“Ngam dei u nongïalam jong ka JAC. Ka kam ka shong pura ha ka MSPCB,” u la ong. U la pynshai ruh ba ka JAC ka trei hapoh u pud synshar jong ka Meghalaya.